Laurence Gavron, naɓokayanke, potoowo kadi wallifiyanke Senegaalnaajo-Faraysenaajo yaltii aduna hanki 14 Silto, to Paris wuro ngo o jibinanoo ngo tawi omo yahra he duuɓi 68. Yaltini kabaaru o ko Agence de Presse Sénégalaise ( APS ).
O ɗoo ŋeeñalyanke panniiɗo he mecce keewɗe wuurii he nder keydi Senegaal ko ene wona duuɓi cappanɗe tati, kadi o heɓiino ɗerewol ɓiyngu leydaagu Senegaal, leydi ndi o suɓii ɓamtude pine mum e aadaaji mum rewrude he ballifanɗe makko e golle makko naɓokayankeeje.
Laurence Gavron, jibinaa ko he saare Paris he hitaande 1955, o fuɗɗorii ko wonde jaayndiyanke kiñoowo naɓaka (cinema). O fuɗɗiima waɗtude yillaade Senegaal maa won duuɓi cappanɗe tati, kono ko gila hitaande 2002 o felliti jooɗaade he Dakaar. Leydi Senegaal e yimɓe mum ko ɗuum woni ko huunde taweteede he ko ɓuri heewde e ballifanɗe makko, ɗe ene jeyaa he mum en: ‘’Marabouts d’ficelle’’ (La Baleine, 2000), les polars ‘’Boy Dakar’’ (Le Masque, 2008), ‘’Hivernage’’ (Le Masque, 2009) e ‘’Fouta Street’’ (Le Masque, 2017). Sakkitiinde ndee, Fouta Street ko kanum rokkimo njeenaari, Prix du roman d’aventures, he 2017.
Ko jiidaa he wallifooji makko Penti/Miili, Laurence Gavron yuɓɓinii filmaaji dokimanteer keewɗi he nguurndameeje Senegaalnaaɓe lolluɓe, ko wayno Jibriil Joop Maambeti, Sammba Jabare Sammbu, Yaande Koddu, Njaga Mbaye e woɗɓe, kono kadi leñɗi keewɗi koɗɗi he leydi he. Golle makko to bannge nate (photographique) mbejaama he nokkuuji keewɗi he nder aduna o, kadi ene ceedtoo giɗgol makko he Senegaal e finaatawaaji mum. O wonno ko he habanaade waɗde filma dokimanteer he Aliwun Joop cosɗo jaaynde Présence Africaine e galle muulngo defte kadi biyeteeɗo noon.
Laurence Gavron woppii caggal mum ndonateeri ngalɗundi kadi e fannuuji keewɗi ceertuɗi, tawa huunde heen kala ene seedtoo giɗgol makko he leydi Senegaal e pine mum.
