Gine, Alhajji Alseyni Dalaba Bari Joɗɗinaama hanki Aaɓnde 22/10/23, he gaŋnguneewal ngardiigu Dental Fulɓe e Haali Pular en he nder Gine. Ɗuum waɗi ko to wuro laamorgo ngoo, Konaakiri, to Stade Lansana Konte, he tawtoreede ujunnaaje limtinɗe yimɓe arɓe hawrutde he ngaal piilngal aadayeewal.
Alhajji Alseyni Dalaba Bari suɓaama gila ɗiɗi lewru Seɗto caggal nde gardinooɗo dental ngal, Alhajji Usmaan Bari (San Loi) maayi ñalnde 26 Mbooy, 2023. Ko mawɓe diiwe jeenay Fuuta Jalon ɗee fof ndental cuɓoo Hooreejo Dental Fulɓe e Haali-Pulaar he nder Gine.
Nde o ƴetti konngol caggal nde o fiila, oyettii mawɓe, annduɓe, e almameeɓe ɓe he ballal mum en ngam no ngal Kawtal laatorii. O noddi kadi ɓiyɓe La Gine fof nde ndentata ndaradoo ngam haa jam waawa duumaade he nder leydi mum en. “Leydi men ene mari ngaluuji keewɗi, kono so nanondiral alaa hakkunde men ɗiin ngaluuji nafataa, naftortaake. Ko yo en ndokkondir juuɗe ngam mbaawen yahrude yeeso.” Hooreejo Dental Fulɓe e Haali Pular keso hollitii wonnde: “En tampii he ɗii boneeji, yimɓe nana mbaree, woɗɓe nana mbarminee, so tawno dente (leñɗi gine) ɗee fof nanondirii tawa ɓe kaalanta laamuuji ɗii e dawriyankooɓe ɓee tan koko woni ngoonga ko, ndeen ma jam e deeƴre artatno he nder leydi men, kadi ko ndeen sukaaɓe men wirɓe e rewɓe mbaawata naftoraade ngaluuji leydi ndi.”
Mawɗo Fulɓe o eeriima sukaaɓe ɓee nde ngoppata haalaji bonɗi ɗi ɓe kaalata he nder layti-renndo (reseaux sociaux).
