Konu Mali hollirii wonnde jaɓtii wuro Kidal he juuɗe murtuɓe Tuwaareg en, caggal nde Minusma yalti he tuddule ɗe daakinoo he ndeen falnde to bannge rewo leydi to. Caggal jonte pellondiral e hareeji muusɗi hakkunde konu leydi Mali e konu murtuɓe Azawad (pelle njeytaagu Tuwaareg en), konu laamuyankeewu nguu heɓii poolgu wonndude e ballal yoɓefella’en Wagner.
Murtuɓe Tuwaareg en ɓee qirliima nguun poolgu, sabu ɓe kabrii wonnde kooninkooɓe maɓɓe njaltii Kidal, wuro ngoɓe laafinoo gila he 2013.
Konu Mali habrii gila ñalnde Mawbaare (Talaata) 14 Jolal wonnde heɓtii Kidal he juuɗe Murɓe Tuwaareg en ɓee, ɓe ngoo wuro staraateejik wonno he les njiimaandi mum en ko ene wona jooni duuɓi sappo. Heɓtunoode Kidal he juuɗe murɓe ɓee ko huunde laamu Mali himmirnoo no feewi, nde tawnoo ɗuum ene tabitina jiimgol laamu Bamako he wertaango leydi Mali fof.
Caggal nde ɓe qirlii poolgu konu Mali e wallidiiɓe mum en Wagner he dow konu maɓɓe, kalfinaaɗo konngol maɓɓe oo woondi wonnde hare ndee gasaani koko jokkata. O eeriima harbiyankooɓe maɓɓe nde njokkata dadaade e heblanaade njoftiigu.
Gartugol Kidal he juuɗe konu Mali, jibinii hoolaare hesere he ɓerɗe biyɓe Malinaaɓe, kadi ɓeydaniiɓe pellital heedde caggal laamu kooninkooɓe ɓe nguu he gardagol Kolonel Asimi Goytaa, ɓe he yiynnde maɓɓe ko arɓe rimɗinde leydi Mali e fawtude ɗum he laawol ndimaagu timmungu.
