Hayso tawii ko Makki Sal heddoraa he hoore laamu leydi Senegaal natti heewde ne, maa taw o yiɗaa yahde tawa omo woppidi ɓiyngel mooroowo ngel he hoore firnde. Kadi maa taw hay muggi itti feloore so dañaama ɓuri mehre. Ko he ngoon yeeso maa taw mbaawɗen taraade, ko Seek Umar Aan, jaagorɗo kalfinaaɗo jaŋde kadi meer Njum, haali he yeeso sukaaɓe komin mum. He biyɗe makko maa Hooreejo leydi Makki Sal waɗ njillu he nder Njum he lewru Siilo fayndu daraade ndu, tawa addatamo ɗoon ko fawde tuufeeje mahateeje ɗiɗi paayodinɗe, duɗal janngirgal mecce (centre de formation professionnelle) e duɗal jaŋde hakkundeere (lycée d’excellence de Ndioum).
He biyɗe jaagorɗo kalfinaaɗo jaŋde o, kadi meer wuro ngo, keblirngal mecce ngal njaru mum ene eyɓinaa fotde miliyaar e feccere, duɗal hakkundeewal ngal kanum maa njaru tolno he 15 miliyaar he kaalis cfa. Kanko jaagorɗo o hollirii wonnde duɗal hakkundeewal ngal maa waaw nawde fotde ujunere (1000) janngoowo, ma ngal waɗ internet, kadi maa tawe he maggal binndanɗe ko yowitii he fannuuji nganndiweeje (des modules sur les matières scientifiques).
He biyɗe meer Njum o, so ɗeen duɗe ngasii tawtii ENO (l’espace numérique ouvert) maa ɗuum waɗtu Njum kapitaal Rewoori Senegaal. Kono, hono no woowi nanireede ñalnde kala he kunuɗe dawriyankooɓe, teeŋti nde suɓngooji paandi, meer Njum o fawii heen kadi fodoore wonnde, kono suuɗnde sarɗi: “Wonndude e Hooreejo Makki Sal e mawɗo jaagorɗe o, Aamadu Bah, fayndaare amen ko waɗde Njum teerirde janngooɓe, yahngartaa, e waɗde ɗum saare mawnde, tawa ko ɗo boli faggude bannge rewo o fof kawrata”.
