Mati Joop naɓokayanke Senegaalnaajo-Faraysenaajo, nawii njeenaari ɓurndi toowde (Ursu kanŋŋe) koolol Berlinale, sabu filma makko dokimanteer “Dahomey”. Filma oo haalata koko fayti he gartirgol to leydi Benin, ngaluuji ŋeeñal (arts) ɗi semmbe koloñaal Faraysenaaɓe ngujjunoo he 1892.
He 2021, laamu Farayse tottii laamu Benin geɗe 26 jeyanooɗe he ɗiin ngaluuji, tawi ko geɗe ŋeeñalyankooje, aadayankooje, e daartolyankeeje, ene jeyaa heen gannguneewal (jooɗorde laamɗo) ronaa-roni ngal laamɓe Benin ɓooymaa kutortonoo. Ngal gannguneewel sakkitinoo huwtoraade ɗum ko Behanzin cakkitiiɗo laamaade laamanteeri Dahomey, kono e geɗe goɗɗe daartolyankeeje, ko wayno cawbi ɗi jaambareeɓe maɓɓe njogotonoo so ene njeysa, e baafe galle laamorɗo o tawi ko koobaaɗe kaŋŋe.
He 2021, Emmanuel Macron jaɓɓinooma Patrice Talon hooreejo leydi Benin ngam siifondirde e mum nanondiral ngam tottide Benin geɗe 26 ɗe semmbe Farayse rusnoo ummoraade he galle laamorɗo Abomey. Ɗeen geɗe mbejanoo ko to Musee Quai Branly to Paris, ko nde noppi maɓɓe cukki gulaali yimɓe wiyatnooɓe, ɗiin ngaluuji paggitoraaɗi no laawɗaani, yoo tottite jooma-mum en, ko ndeen ɓe pelliti nawtudeɗi, ɗi mbejoyaa to mooftirdu ganni daartolyankeeru Ouidah to Benin.
Ɗeen 26 ittaaɗe to laamu Dahomey kiiɗngu, ene njeyanoo he geɗe 70,000 taweteeɗi he Musee Quai Branly ittaaɗe he leyɗeele Afrik gila he laamuuji gaadanteeji ɗi Faraysenaaɓe ndusi, tawi ko geɗe mooftuɗe daartol, ŋeeñal e pine ɗeen leyɗeele Afrik ɗe ɗuum itta.
Ñalnde Hoore-biir, 24 Colte, Mati Joop ƴettii njeenaari ɓurndi toowde he ngol ɗoo koolol 74 naɓol, o wonii ɓaleejo gadiiɗo dañde teddungal ƴettude Ursi kaŋŋe he koolol Berlinale, tawii ardii ñaawatnooɓe ɓee ko Lupita Nyong’o dewbo Keñaanaajo pijoowo naɓoka, dowluɗo. Kadi hawri ko ngol laawol neɗɗo ɓaleejo meeɗi ardaade ñaawooɓe he ngel ɗoo kawgal naɓoka jeyaaɗo he ɓurɗi mawnude he kooli naɓoka he nder Aduna he.
Eɗen ciftina tan, Mati Joop, naɓokayanke Senegaalnaajo o, ƴettino kadi njeenaari (Grand Prix) to Koolol Cannes 2019, sabu filma makko Atlantics.
