He jonte jawtu\u0257e \u0257ee to\u0253\u0253ere nde Ful\u0253e Senegaalnaa\u0253e \u0253urnoo waawde dukde he nder layti renndo (reseau sociaux) he ko no Ful\u0253e pecciraa, mba\u0257aa \u01b4ele hono le\u00f1\u0257i keew\u0257i ceertu\u0257i ni he nder Senegaal. Nde kaayitol e\u0253\u0253o laa\u0253nde jogor\u0257e laa\u0253ndoyeede to limtogol ngol yalti yim\u0253e \u0253ee njiyi \u0257um ndee, \u0257um jibinii mettere fantunde he nder le\u00f1ol he. Yim\u0253e heew\u0253e ndarii e hirjinde \u0253iy\u0253e le\u00f1ol ngol yoo calo fecceede e sareede, nde tawnoo alaa ko waawi faameede he ndee \u0257oo feere so wonaa ko miiji\u0253e \u0257um ndee, fayndaare mum en ko ustude le\u00f1ol Ful\u0253e e held edoole mum en.<\/p>\n\n\n\n
So goonga tan, le\u00f1ol Ful\u0253e \u0253ooyii fecceede he nder Senegaal, \u0253ee ko Peuls en, \u0253eya ko Toucouleur en, wo\u0257\u0253e nii ko innde hinnde mum en tan noddirtee woni Law\u0253e. Ko noon waynoo gila e laamu kolo\u00f1aal. Hol ko wonno sabaabu \u0257uum, mbele ko sabu tuubaakoo\u0253e \u0253ee waasnoode faamde Ful\u0253e ko le\u00f1ol gootol, jooma en kin\u0257e keew\u0257e, kadi ene wa\u0257i e mum en Ful\u0253e saarankoo\u0253e e dowri\u014bkoo\u0253e, kono ene njogitii koye mum en ko le\u00f1ol gootol sabu kaalata ko \u0257emngal gootal? Walla hono no yaltiri he nder binndan\u0257e ma\u0253\u0253e keew\u0257e, e \u0253e nji\u0257noo seerndude le\u00f1ol Ful\u0253e sabu \u0253e teskiima ngootaagu mum en e nanondiral mum en ene waawi faddaade koonogol ma\u0253\u0253e he nder Senegaal he keeriindi, Afrik he kuu\u0253al? Kala ko waawnoo heen wonde ne, caggal nde Senegaal he\u0253ti ndimaagu mum dawrugol, wa\u0257ti fewjande hoore mum \u0257uum ene fotnoo waylaade. Tee\u014bti nde Ful\u0253e, sabu keewal mum en he nder Senegaal e ja\u0253de \u0257um en janngud, ene tawee he nder kala gollor\u0257e laamu ngu. So \u0257um majjere walla so \u0257um teyaa\u0257e wonnoo, \u0253een Ful\u0253e ene potnoo daraade e no \u0257uum wayliraa gila ko \u0253ooyi. Kono e\u0257en nganndi won e hareeji wonaa ne\u0257\u0257o gooto tan waawi ha\u0253eede \u0257um, ko maa wonnda e dental.<\/p>\n\n\n\n
Fedde \u0181amtoore Pulaar Senegaal (Association Pour la Renaissance du Pulaar) gila nde tafaa tuma nde Senegaal woni he weetndooga mum jeytaare, kuccam mum wonnoo ko \u0253amtude \u0257emngal Pulaar e pinal Ful\u0253e he nder Senegaal, rewrude he noddude fayde he ngootaagu Ful\u0253e Senegaal he kala \u0257o \u0253e mbaawi jeyeede he nder wertaango leydi Senegaal. Kono ko tuggude he sappannde 80\u0253ere teemedannde sakkitiinde ndee, haa yetti e ki\u0253\u0253ugol ujunannde \u0257i\u0257imere ndee golle mayre \u0253urnoo teskinde e anndeede he nder le\u00f1ol he. He oon tuma \u0253e ndaraniima no \u0257emngal Pulaar janngiraa, \u0253e udditi du\u0257e he nder wertaango leydi Senegaal hee kala; \u0253e pinndini yim\u0253e e faamde nafoore janngude \u0257emngal mum. Ene jeyaa e ko \u0253uri teskinde kadi e golle ma\u0253\u0253e, ko wonnde yoo Ful\u0253e \u0253eydo faamde ko le\u00f1ol gootol, caloo peccooru in\u0257e e kin\u0257e, poo\u0257anoo dental. Ngoon eeraango, e \u0257iin kirjinaali, ene waawi wiyeede ko kanum jibini famamuya keso da\u00f1aa\u0257o o, wonnde Ful\u0253e ko le\u00f1ol gootol, \u0257emngal gootal, haysinno kam\u0253e he nder ma\u0253\u0253e e \u0253e luurandiratnoo mbele ngool le\u00f1ol foti wiyeede ko Ful\u0253e walla ko Haalpulaar\u2019en?<\/p>\n\n\n\n
Hay haame noon, ndeen fedde e faayiida mo nde fu\u0257\u0257inoo da\u00f1de he wallude le\u00f1ol ngol yiytondirde e hoore mum kadi e sippiraneede jojjan\u0257e maggol; ha\u0253anaade \u0253amtaare \u0257emngal ngal e tabitinde ngal, \u0257o sakket \u0257oo nde wonti ko fedde heedi-heedaaji e lanndaaji tawi alaa ko saabi \u0257uum so wonaa koongu e yi\u0257de ardaade. Ko nde ha\u0253otonoo koo, woni ittude peccooru, kin\u0257e e diiwaanuuji walla hakkunde Ful\u0253e aynaa\u0253e e saarankoo\u0253e, ko nguun ceeriigu wa\u0257tindii jaalaade he mayre ha fusi nde, haa nde wonti fehre meere nde alaa lekki. So Fedde \u0181amtoore Pulaar wonnoo ko \u00f1aw\u0257o jiimaa\u0257o Tabital Pulaaku ari jokkiti \u0257um, hayso tawii ndeen dee sooyna noo e mum ko mbele tabitina ngootaagu Ful\u0253e he nder Adunaaru he kala semmbina \u0257um en.<\/p>\n\n\n\n
He nder oo wuuku-waaka e woysaayoo mo limtagol yim\u0253e Senegaal jibini, ene fee\u00f1i heen wonnde Ful\u0253e Senegaal ngalaa dental walla kam mbiyen ngalaa gardii\u0257o. Nde tawnoo en njiyii gooto fof hollirii mette mum e no \u0257um wa\u0257iraa ni, kadi gooto kala ene ja\u0253i le\u00f1ol ngol ene foti daraade saloo \u0257um haa yoora yoorda e laalogal. Kono en njiyaani hay fedde wootere walla ne\u0257\u0257o gooto mo le\u00f1ol ngol joofii, wiy ko o pot\u0257en umminde yaha soccondiroyee e nguu fiyaaku he innde le\u00f1ol ngol kala, haa ndee fenaande ittee goonga lomtine \u0257oon. Tee ne dee he nder Senegaal, wonaa pelle biyooje ko \u0253amtaare \u0257emngal, pinal e tabitinde hurum le\u00f1ol Ful\u0253e ummini \u0257um \u014bakka\u0257en, wona yim\u0253e ne kay \u0253oornii\u0253e wutte ko kanum en ngoni maw\u0253e le\u00f1ol Ful\u0253e \u0257awa \u0257en. Ko goonga ne kay nde gulaali \u0257ii keewi ndee, yim\u0253e \u0253ee kolliti mettere mum he nder layti renndooji he, won \u0253oornii\u0253e pa\u0257e mum en njehi to \u00f1ii\u0253irde yu\u0253\u0253o halfinaango limtogol ngoo, ANSD, ngam hujjondiroyde e mum en, tawi nii wonaa le\u00f1ol ngol nuli \u0257um en, kadi tawi yah\u0253e toon \u0253ee fof, hay gooto heen tintondiraani e go\u0257\u0257o o; \u0253e \u0253amdaani e feere walla \u0253e diisnondira he dawro (strategie). Maa \u0257e\u0253aa wiyde ni gooto heen kala nawi \u0257um toon ko haa da\u00f1a no fiytorii becce, wonnde kanum ha\u0257i \u0257um \u0257oo wonde. Hayso tawii enen kam en nji\u0257aa yiyrude \u0257um noon, nde tawno yim\u0253e pelle pinal, dawrugol, san\u0257aa\u0253e Ful\u0253e walla jaayndiyankoo\u0253e yah\u0253e toon \u0253ee kala ko he\u0253tinaa\u0253e he \u0253ooyde dukde e ha\u0253aade he ko wayni. Kono noon Haalpulaar en mbiy: \u201cKo alaa hoore yahataa, kono koye sappo kadi mbaawaa yahde nde tawnoo wootere heen kala foo\u0257irta ko bannge mum.\u201d<\/p>\n\n\n\n
Ko goonga le\u00f1ol mawngol bayngol hono no Ful\u0253e nii, haysinno ko he nder Senegaal tan, wiyde ene da\u00f1ana \u0257um en fedde wootere renndinnde \u0257um en kanum en fof, walla ne\u0257\u0257o gooto kaaloowo he innde mum en kanum en fof, hono no Lebu en nii, so en ndokkii yeru, wonaa ko waawi laataade. Lebu en ko le\u00f1el tokkosel so a yerondirii \u0257um en e Ful\u0253e, kam\u0253e ko \u0253e see\u0257a kadi \u0253e njaajaani, ko lee\u0257e tan \u0253e njogii he nder diiwal kapweer (Ndakaaru haa Tinngeej), \u0257uum wa\u0257i e \u0253e mbaawi rentude \u0253e tafa nju\u0253\u0253udi \u0253e cu\u0253oo ar\u0257o ma\u0253\u0253e, kam\u0253e kala \u0253e keddoo caggal mum. Ful\u0253e noon, he nder Senegaal njogii heen ko ley\u0257eele. Sabu Fuuta Tooro ko leydi, \u0181unndu ko leydi, Fuladu ko leydi Jolof ko leydi,\u00d1ooro di Rip (Siin e Saalum) \u0257um fof, ngootiri heen fof haysinno hannde ko diiwal tan he nder Senegaal ne, hanki ko leydi wonnoo ene wa\u0257i diiwe mum e nju\u0253\u0253udi mum; laam\u0253e mum en, jaagor\u0257e e ar\u0257oo\u0253e mum en. Seernabaa\u0253e e hoohoo\u0253e mum en. Wiyde ene renndina \u0257um \u0257oo fof he tamannde wootere wonaa ko wee\u0253ata.<\/p>\n\n\n\n
\u018auum fof e wayde noon, fedde waynde no Fedde \u0181amtoore Pulaar-Tabital Pulaagu, sabu kanum tan woni fedde Ful\u0253e Senegaal fof, hayso wonaa Ful\u0253e \u0253ee fof nootii e mayre, waawde ko way nii so wa\u0257ii, ko haaju le\u00f1ol ngol kala, nde nodda denndaangal pelle, dente, anndu\u0253e kam e kala yim\u0253e he\u0253tinaa\u0253e he daranaade nafoore le\u00f1ol ngol \u0253e njoo\u0257adoo \u0253e njeewta \u0253e \u0253amda he dow feere wootere, tawa wonaa wiyee maayo wa\u0257ii ndiyam tan gooto fof wiya heen pu\u00f1ca\u014b anndaa ko noodi tawata toon, anndaa ko he yiriinde saamata.<\/p>\n\n\n\n
Ful\u0253e Senegaal hayso en ngalaa dental gootal ne, e\u0257en njogii dente keew\u0257e, kadi won e majje ko keew\u0257e semmbe, \u0257e so kuwtoraama ene mbaawi waylande le\u00f1ol ngol ko heewi.<\/p>\n\n\n\n
E\u0257en njogii seernaa\u0253e, halifaa\u0253e diine \u0253e ndokku\u0257en ge\u0257al kurmi\u0257en, kono kadi \u0253e laamu leydi Senegaal nguu hurmorii , sabu mum anndude \u0257o paw\u0257en seerna\u0253e men. Yeru, galle Seyku Umar al-Fuutiyyu (Ceerno Basiir e Ceerno Madaani), dental men Mbuur e Gunaas, ko wayno \u0253een ene heewi diiwe Ful\u0253e \u0257e limtu\u0257en dow \u0257ee, ar\u0257oo\u0253e men e maw\u0253e aada en, tuugnaade e no peccirno\u0257en ge\u0257e renndooji men hanki, gooto heen kala ko ke\u0257anaa\u0257o nanantee\u0257o. Ko hono noon pelle men pine e renndoyankeeje; pelle san\u0257aa\u0253e ko wayno MEEF walla pelle jaayndiyankoo\u0253e Ful\u0253e. \u018aum fof ko semmbe le\u00f1ol ngol, doole baaw\u0257e huwtoreede he won fiyakuuji.<\/p>\n\n\n\n
Ko \u0257uum wa\u0257i e yiyannde hoore am, Hooreejo men Dr. Fari Silat Kah, he darnde mum wonde maw\u0257o fedde Ful\u0253e Senegaal, ko adii nde omo \u0253oorno pa\u0257e makko omo yaha he \u0257ee koy\u0257e kanko tan walla kanko e huunde e ter\u0257e ARP-TP, omo fotnoo jokkondirde e maw\u0253e le\u00f1ol ngol heddii\u0253e \u0253ee o diisnondira e mum en heen. \u018auum woni khalifaa\u0253e men, ar\u0257oo\u0253e men, maw\u0253e pelle Ful\u0253e ganndaa\u0257e he nder Senegaal \u0257ee e anndu\u0253e le\u00f1ol ngol e jaayndiyankoo\u0253e men. Mi wiyaani noon dawriyankoo\u0253e, \u0253een ene njogii \u0257o tijjaa, kono won \u0257o e\u0253e noddee \u0253e pergitat en tan, kono \u0253e mballataa. Ene jogii \u0257o tii\u0257i \u0257o \u0253e mbaawi heedde noon so \u0253e nja\u0253i.<\/p>\n\n\n\n
\u0181ataake mo o nawi toon ene wa\u0257i siifannde makko kanko tan gooto o, so Ceerno Basiiru, Ceerno Madaani, Ceerno Ahmad Tijjan Bah, Ceerno Seykh Tijani Baro, ar\u0257oo\u0253e men maw\u0253e, e gooto kala e maw\u0253e pelle Ful\u0253e Senegaal, ko wayno Goodal, Kisal Deeyirde Senegaal, ekn., \u0253eydiino heen siifannde mum e\u0257en \u0257aminii \u0257uum ene waawi dillinde hay maw\u0257o leydi o. Kadi \u0253e innu \u0257en dow \u0253ee hono mum en nana Fuuta, \u0181unndu, Fuladu, Ferlo e \u00d1ooro di Rip (Siin e Saalum).<\/p>\n\n\n\n
Ko goonga seernaa\u0253e men, ene teddi umminde he nootoyaade batuuji haysinno alaa ko le\u00f1ol ngol jaranaani \u0253e, kono so \u0253e teddiniraama kadi \u0253e pamminaa-ma fayndaare nde, e \u0253e mbaawi lomtinde \u0253iy\u0253e walla almuu\u0253e, sabu hoto en njejjit ene jeyaa e \u0253een almuu\u0253e, jaayndiyankoo\u0253e, porofesoor en jaa\u0253ihaa\u0257tirdi e hujjiyankoo\u0253e (avocat) tawa kala ko le\u00f1ol ngol nanondiri so ngartirii e ma\u0253\u0253e ma \u0253e mballu e daranaade \u0257um. Ko noon hay dawriyankoo\u0253e men, so teddiniraama ene mbaawi addude ballal les haysinno cuusaa fe\u00f1\u00f1ikinaade.<\/p>\n\n\n\n
Dental Ful\u0253e Senegaal waawi wonde tan ko he renndinde doole men (unir nos forces) \u0257uum firtaani maa ngonen fedde wootere gardii\u0257o gooto, firti ko maa dente doolnu\u0257e \u0257ee nanngondira, ballondira e kala ko woni nafoore huu\u0253todinnde le\u00f1ol ngol. Sabu le\u00f1ol mawngol, jaajngol hono no Ful\u0253e Senegaal ni, sarii\u0253e he nder wertaango leydi Senegaal fof, wa\u0257de \u0257um en he tamannde wootere wonaa ko aa\u0253noto. Kono e\u0257en mbaawi wonde le\u00f1ol kaaldowol, diisnondiroowol e koye men, renndoo\u0253e peeje, \u0253amdoo\u0253e konngol. Tawa renndo kala (fedde pinal walla dental diine) ene heddii he ndimaagu mum, ene woni he ko ummini \u0257um ko. Kono so renndude feere yontii tawa e\u0257en mbaawi noddondirde njeewtiden, ndiisnondiren tawa gooto kala ene hurmii go\u0257\u0257o o; gooto kala, e no semmbe mum e martaba mum waawi fotde kala ene anndi kanum tan waawaa wonde le\u00f1ol. So haaldude e fewjidde yontii, dental kala, e fedde kala ene jogii jojjannde noddeede e he\u0257eede.<\/p>\n\n\n\n
Hayso tawii pelle Ful\u0253e ene keewi hannde he nder Senegaal ne, ko Fedde \u0181amtoore Pulaar Senegaal woni fedde Ful\u0253e Senegaalnaa\u0253e fof, sabu ko kayre tan mee\u0257i da\u00f1de cate e pe\u014b\u0257e he nder wertaango leydi Senegaal hee fof. Hayso tawii \u0257uum hannde nattii ne, oon martaba nana \u0257oon heddii. Wa\u0257de Fedde \u0181amtoore Pulaar ene foti huwtoraade oon farta\u014b\u014be ngam mahtaade hoore mum he ja\u0253\u0253al kesal. Wonaa yo nde uddit cate e pe\u014b\u0257e he nder leydi he kala, haysinno nii so \u0257uum wa\u0257aama ko huunde moyyere, kono ko yoo kuccam mayre won renndinde semmbeeji guur\u0257i Ful\u0253e \u0257ii kala, \u0257uum woni hilifaa\u0253e men diine e dente mum en; anndu\u0253e men tuubakiri, dawriyankoo\u0253e men e pelle men pine, aada, e fanniyankeeje. \u0181e maha koolondiral, diisnondiral, gollondiral e \u0253amdude peeje he kala ko to\u0257\u0257ii le\u00f1ol ngol, tawa gooto heen kala ene heddii he ndimaagu mum.<\/p>\n\n\n\n
Kadi kala haaju ene jogii hollittee\u0253e \u0257um e noddetee\u0253e heen. So ne\u0257\u0257o meereejo finii tan naatii he nder layti renndo \u01b4attiima le\u00f1ol Ful\u0253e, yoo sukaa\u0253e nele \u01b4attoo \u0257um, So jaayndiyanke walla jaaynde finii wiy ene aybina Ful\u0253e yoo jaayndiyankoo\u0253e Ful\u0253e e anndu\u0253e men tuubakiri mbinndu njaaboo, tawa ene mbaawi fennude walla suutude oon ayiiba lomtina \u0257oon teddungal.<\/p>\n\n\n\n
So laamu e\u0253\u0253i feere waawnde jibinande le\u00f1ol Ful\u0253e walla \u0257emngal Pulaar ustaare, ko yoo Fedde \u0181amtaare Pulaar ya\u0253\u0253u koy\u0257e mum yettoo maw\u0253e men e hilifaa\u0253e men diine e aada, jeertina \u0257um en, finndina \u0257um en he ko ndeen e\u0253\u0253aanda waawi jibinande le\u00f1ol ngol, diisnondira e pelle Ful\u0253e go\u0257\u0257e \u0257ee e peeje, tawa kala ko wa\u0257aa heen janngo koko \u0253amdaa. Walla haysinno gooto kala haalirii bannge mum ne wonata haala luurduka nde tawnoo koko yeewtidaa ene faamondira.<\/p>\n\n\n\n
Ndeke noon Ful\u0253e Senegaal wonaa pelle walla dente \u014bakkiri en, \u014bakkira \u0257en ko kaaldigal hakkunde dente men e pelle men, e renndude peeje e dawro he kala ko to\u0257\u0257ii le\u00f1ol ngol he kuu\u0253al.<\/p>\n\n\n\n