Umar Bah, Faraysenaajo mo iwdi Senegaalnaajo ene summbi ƴamde lefel sarɗiyanke he suɓngooji Sarɗiyankooɓe Farayse 2024.
He kuccondiral makko e jaayndiyankooɓe, o hollirii ene jeyaa e sababuuji gaddanɗimo yiɗde jeeyede he suɓngooji hee ko ngam yiydemo wonnde Faraysenaaɓe wuurɓe caggal leydi Farayse ɓe, ene keɓe caɗeele no feewi e heɓde jojjanɗe mum en haa teeŋti e ko yowitii e safaara walla jaŋde sukaaɓe mum en. Umar Bah ene jogii njoorto moƴƴo wonnde ma o haw e suɓngooji he. O siftinii wonnde falnde (circonscription) 9ɓre ndee, renndini ko leyɗeele 16 Afrik, tuggude he Maghrib haa yettii Hiirnaange Afrik. O hollitii wonnde ko ɓuri heewɓe e suɓiyankooɓe ɓee ngoni ko he Marok, Tunis, Algeri, Senegaal, Mali, Gine e Muritani.
O wiy he yiyannde makko ko kanko jogii profil ɓurɗo moƴƴude ngam waawde daranaade Farayse he nder Senegaal kadi he nder Afrik. “Farayse waawaa dañde sarɗiyanke kaanduɗo heen haa ɓurimi. Ƴamgol am lefol sarɗiyanke ngol ko ɗum malal wonande Farayse,” o wiy tuma nde o hucciti e jaayndiyankooɓe.
Umar Bah jeyaa ko boyinnaaji, diiwal Maatam, ko he Senegaal o adii janngude hade makko yahde Farayse o jokkoyi toon. O wuuri he nder Farayse ma won jooni duuɓi cappanɗe tati.
