Gila hitaande 2015 leydi Muritani ene mawnina gure ganniija Muritani he nder ñalɗi ɗi ɓe noddirta he Farayse “festival des villes anciennes”, kono gila ɗum fuɗɗii haaɗi tan ko to gure rewo too ko wayno Sinngitti, Tisitti, Wadaan, e Waalata, meeɗaani yettaade worgoori leydi ndi to woni jey e ganni ɓaleeɓe ɓee too, hayso tawii nii eɗen mbaawi wiyde Muritani fof ko ganniiri ɓalleɓe. Hikka noon ɗuum wayliima nde tawnoo koolol hikka ngol mawninoyaa ko Jowol Saare Seɓɓe.
Jowol ko wuro ganni, kadi soomngo ko heewi he daartol Fuuta gila he yontaaji Farbaaɓe haa yettii laamu Deeniyankooɓe. Wuro jaambaraagal e dartaare, kono kadi ko wuro pinal e ganndal. Ɗo Fulɓe e Sooniŋkooɓe koɗdi he beldal, jiidigal enɗam e renndude daartol.
Tuggude ñalnde 17 haa 19 Mbooy, Jowol woni kapital pinal leydi Muritani, rewrude he mawningol gure ganniije he tawtoreede hooreejo leydi Muritani, Wuldu Ghaswaani e joogorɗe mum teeŋti e jaagorɗo kalfinaaɗo pinal mo ngannduɗaa ko kañum yuɓɓini ɗii ñalɗi. Kono kadi ɗum waɗii he tawtoreede dawriyankooɓe, suɓaaɓe, e halfinaaɓe diiwal gorgol ɗo wuro Jowol ngoo limetee he nder feccere yiilngo laamu Muritani. Hayso tawii koolol Jowol seertaani no feewi e kooli jawtuɗi ɗii to bannge jeewte,jammaaji welnere e pinal, walla to bannge wejooji, nde tawnoo diwal kala addii ko mum, jowol hollirii keerindi mum to bannge wertaango e koɗkii, tule, ceene e powle maayo mum ɗe gootel heen kala ko defterdu timmundu seeɗtotoondu daartol Fuuta e jaambareeɓe mum hanki dartiyankooɓe.
Jammaaji Pinale e welnere
He nder ɗii jammaaji welnere hakkunde naalankaagal ganni e naalankaagal kesal fof yiyaama ɗoon. Ko wayno dillere maabuɓe, pekaan subalɓe e gumbalaa seɓɓe, yelaa awluɓe, kono Goomu Pinal Jowol e gardagol magoyanke, yimiyanke Pulaar, kadi miijtiyanke Aamadu Sammba Demmbele ngartirii jime pijirlooji dingiral Fuuta hanki.
He ndaɓɓa, eɗen mbaawi wiyde tan Jowol hollirii ngalu pinal yaajngu seertungu mbaydi e eddaaji, gila e ganni haa kesam-hesaagu. Donaaɗi Fulɓe ko wayno ƴaro baali, fiifiire subalɓe e daɗndu laaɗe fof holliraama ɗoon. Daɗndu pucci e karallaagal mbaɗɗu e jeysi jaambareeɓe ko ngannduɗaa ko ɗuum woni maande nde jowol anndiraa, holliraama ɗoon haa Ammbasaoor Kawtal Orop ronki jaggude hoore mum sabu alla e weltaare.
