London, laamrongo England finirii mbummbaay hanki, Hoorebiir 6 Korse, sabu ko ñalawma mawɗo he nder daartol Laamnteeri Ndentundi (United Kingdom) e leyɗeele commonwealth, nde tawnoo ko ñalawma piilngal laamiiɗo maɓɓe Charles III e jooma suudu mum Camilla wonno. Charles jooɗinooma he jappeere laamu Laamanteeri Ndentundi, gila ñalnde nde neene makko Elisabeth II maayi, 8 Silto 2022, kono o toɗɗanooma wonde dono (prince heir) laamu Biritani gila hitaande 1969 tawi omo dañi duuɓi 21, ko hanki ngaal lumtungal timmi tawi omo yahra e duuɓi 74.
Jooɗaademo he ndee jappeere waɗiimo laamɗo Laamanteeri Ndentundi (Angleterre, Écosse, Pays de Galles e Rewo Irlande) yantude e leyɗeele sappo e nay Commonwealth. Ɗeen ngoni :Antigua e Barbuda, Australia, Bahamas, Belize, Kanada, Gerenada, Jamayka, Zealand Keso, Papuwa Gine Keso, Saint Kitts e Nevis, Saint Lucia, Saint Vincent e Gerenadines, Duunde Solomon, Tuvalu. Hayso tawii ɗee leyɗeele kala, hay heen ngootiri yowitaaki e ngoɗndi ndii, jogii ko ndimaagu mum timmungu, e ɓe keddii e renndude laamɗo gooto oon woni hannde Charles III (Sarli 3ɓo).
Caggal piilngal diineyeewal e seremelleeji jaaduɗi e mum to Westminster Abbey e tawtoreede 2,200 teddiniraaɓe ummoriiɓe he nder adunaaru ndu kala, laamɓe hesɓe ɓee kibbitiima faytude hoɗerde mum en Buckingham Palace. Ɓe mbirtiima laabi keewɗi haa ngukkiti yimɓe, arɓe weltoraade nguu ñalngu daartolyankeewu ngu ko ɓuri heewde e maɓɓe meeɗaani hawrude e ko wayno mum, sabu ko wayri waɗɗe wonii jooni duuɓi 70.
Wonaa yimɓe arɓe ɓee fof noon ngoni weltaniiɓe laamɓe hesɓe ɓee, arɓe kallande ɗum en huljinande ɗum en. Terɗe fedde saliiɓe laamu ndonu wiyeteende Republik, kanum en ne ngarii he keewal, ngam hollitde salaare mum en laamu ndonu. Teemedde limtinɗe e maɓɓe ngarii naatti he nder yimɓe ɓee, e ɓe ɓoorni simisaaji e keppiiji ooli ene winndaa “Not my King” wonaa laamɗo am. Kono Polisaaɓe ɓee njaggii gardiiɗo maɓɓe o e maa won 50 e maɓɓe ngam falaadeɓe he kaljingol yimɓe ɓee.
Laamu Biritani woniino laamu ɓurngu mawnude he nder daartol aade. Konnngol ene wiyatnoo: “Naange mutataa he nder laamanteeri Biritani”. Nde tawnoo kala jookdu he nder jookli adunaaru ɗi, e ɓe njoginoo heen leyɗeele gonɗe he les njiimaandi laamu maɓɓe. Nde naange muti hiirnaange laamanteeri maɓɓe fof tawata ko fuɗoyii fuɗnaange. Ene jeyaa e batte mum, ɗemngal maɓɓe Engele wontude ɗemngal winndereyeewal.
