Hooreejo Dowlaaji Dentuɗi Amerik Joe Biden feññinii fayndaare Amerik yaltinde Uganda, Gabon, Nijeer, e Dowla Hakkundeere Afrik (Centre Afric) he yuɓɓo wiyeteengo African Growth Opportunity Act (Agoa). Ɗeen leyɗeele maa wonii ene njaɓɓi jojjannde aade haa ɓurti, walla taaɓanaaki fayde he laamu demokaraasi.
Agoa ko porogaraam mo Amerik ƴettunoo he 2000 ngam wallude Afrik he ɓamtaare. Leyɗeele Afrik naatɗe he oon porograam ɗee fof ene dokkanoo fartaŋŋe waawde naatnude hakke 1800 edda prodiiji mum en he nder Amerik tawa njobaani duwaañ.
Hooreejo Biden wiy Nijeer e Gabon, ɓe ngannduɗaa hannde ko koonunkooɓe ngardii ɗum en, natti waawde jogaade jojjannde he Agoa, sabu ɓe ndarnaani walla ɓe ngonaani e waɗde taaɓanɗe jokkondirɗe fayde he darnude laamu hormiingu jiyanɗe dawrugol ceertuɗe kadi e ɗowtaade laawol.
O wiy kadi itteede Dowla Hakkundeere Afrik e Uganda he oon porogaraam, saabii ɗum ko laamuuji ɗeen leyɗeele yaɓɓude kuule keɓtinaaɗe hakkunde leyɗeele he ko yowitii e jojjannde aade.
He Duujal (Mai), laamu Amerik wiyno woni ko he miijaade ittude Uganda he Agoa, kadi fawa he mum hiiɗeende (sanctions), caggal nde ndiin leydi yawtini kulaal caɗtungal he dow debbati-gorkati en, ɗuum woni kuulal biyngal so neɗɗo nanngiraam ene waɗa won e geɗe debbati-gorkati en ene waawi ñaaweede warngo.
He ɓataake mo Hooreejo leydi Amerik neldi gardiiɗo suudu-batirdu ngenndi Amerik o, ñalnde Aaɓnde (Altine), omo holla heen wonnde Amerik fof e jokkondirde, kam e etaade faamondirde e Dowla Hakkundeere Afrik, Gabon, Nijeer, e Uganda, ɗeen leyɗeele ndonkaama yoo njaabo he ngoƴaaji Amerik he ko fayti e ɗowtaade kuule gaddanooje ɓe dañde jojjannde he Agoa.
