Ma fuɗɗo hannde Naasaande , 16 Jolal, to Muritani, heblo nogaas e jeetati jannginooɓe suɓaaɓe ngam fannaade he jaŋde ɗemɗe ngenndiije (Pulaar, Soninkoore e Jolfe). Fayndaare ndee ko heblude ɓeen jannginooɓe he karallaagal jannginde he ɗemɗe ngenndiije.
Ngoon heblo yuɓɓinte ko tuugnaade he kuulal baylugol tippudi nehdi (jaŋde) biyngal wonnde maa jaŋde he ɗemɗe ngenndiije (Pulaar, Soninke e Wolof) fuɗɗo he mbaydi ƴeewndo tuggude he puɗɗorɗe daawal jaŋde 2024-2025.
Ngaal kuulal gollaama rewrude he dekkere jamirɗo tafeede Duɗal ngenndiwal ngam ƴellitde jaŋde he ɗemɗe ngenndiije(l’institut national pour la promotion de l’enseignement des langues nationales) , kadi cate e goomuuji toɗɗanooɗi he maggal fof ne njoɗɗinaama, ngaluuji kadi ndaɗɗaama fawaade he bidsee gonaaɗo o, he biyɗe nulaaɗo laamu o, hono Mukhtaar Wuldu Dahi, jaagorɗo kalfinaaɗo nedi (jaŋde) ngenndi.
Duɗal ngenndiwal ngam ƴellitde ɗemɗe ngenndiije e ballondiral halfinaaɓe gollooɓe (ressources humaines) ndewindiima cuɓagol ɓeen 28 jannginooɓe he mbaydi ƴeewndo ngam haa mbaawa hebleede he janngin’gol.
Ngal ɗoo njiyondaral gadanal hakkunde ndee ɗoo haralde adannde e golloɓe (personnel administratif) duɗal ngal, yantude e terɗe goomu nganndiwalyankeejo (Conseil Scientifique) o, ene laato puɗɗagol golle duɗal ngenndiwal ngam ƴellitde ɗemɗe ngenndiije, hono no teeŋtiniri ɗum Wuldu Dahi. He biyɗe makko, Muritaninaaɓe fof nanondirii ko aldaa e luural, he 2022, ngam waylude tippudi jaŋde nde. Ngaal nanondiral naatnii mbayliigu lugiɗngu he tippudi jaŋde hee he tolnooji ɗii kala, tuggude he duɗe entaaɓe haa yetti hakkundeeje, rewriɗoon haa fay duɗe toowɗe (jaaɓi haaɗtirde) e fanniyankeeje (professionnel), ngam waawde tafde yuɓɓo jaŋde wootɗinaango, kadi tawi alaa heedi-heeda.
Ɗemɗe ngenndiije ɗee ko kanum en ngoni resorde kadi dontinooje ngaluuji pine ceertuɗi, kadi kamnje ngoni sewnde doole e faaro men, ko ɗuum waɗi maa jaŋde ndee tiiɗtin natondiral pine e ngootaagu leydi ndi, tiiɗtina kadi jikkuuji ɓiyngu leydaagu ko aldaa e heedi-heeda, o ɓeydi heen kanko jaagorɗo o.
Hooreejo duɗal ngal, caggal nde siftini payndaale e sababuuji gaddanɗi duɗal ngal tafeede, o hollirii wonnde yimɓe suɓaaɓe ngam haa mbaawa hebleede ɓee, cuɓaa ko he dow sarɗiiji laaɓtuɗi wonndude he fayndaare laaɓtunde, ene jeyaa he ɗiin sarɗiiji, pellital e goongɗinde daraade, nde tawnoo ko ɗuum tan saabotoo tonagol (rćussite), ngooɗo ƴeewndo jooɗtoraango he puɗɗorɗe daawal jaŋde 2024-2025.
