Mammadu Talla, kalfinaaɗo kuuɓal denndingol parenaasuuji BBY he nder diiwal Maatam, totti Abdullaay Jaañ, kalfinaaɗo parenaas he nder leydi o, 181867 defaande (parrains). Ɗuum waɗi ko he tawtoreede mawɗo jaagorɗe o, kandidaa BBY, Aamadu Bayal Bah e hoohooɓe dawriyaagal diiwal ngal, ko wayno Daawuda Muusa Jah, kalfinaaɗo ngaynaaka, Muusa Bookar Caam, jaagorɗo kalfinaaɗo kominikaasiyoŋ, telekominikaasiyoŋ e nimerik, yantude e Farba Ngom meer mo aañam kadi sarɗiyanke, e hoohowɓe kawtal BBY he nder Maatam.
Caggal nde Farba ƴetti konngol o wulni ɓalli joɗnde ndee, kanko Mammadu Tall nde konngol arti he makko, o wiy ko adii fof o yettii hooreejo leydi o nde waɗti hoolaare mum he makko kadi wonde kalfinaaɗo denndingol parenaasuuji diwaal Maatam.
O yettii kadi denndaangal yimɓe diiwal Maatam, dariiɓe kanum en fof ngam haa ngol ɗoo denndingol parenaasuuji waawi rewde laawol. “Tuggude he Boosoya haa yettii Lowre, rewrude he Ngenaar haa Damga, ummaade gila Daande Maayo haa yettii Ferlo, sukaaɓe e rewɓe ndoondiima naange e punndi ngam renndinde parenaasuuji wonndude e pellital e yarlitaare.”
He ɓiyɗe jaagorɗo kiiɗɗo kalfinanooɗo jaŋde e nehdi o, “ Denndaagal yimɓe diiwal Maatam ene teeŋtina kadi hoolaare mum en e pellital mum en jokkude darodaade e wallude kawtal men mawngal BBY” Kanko nelaaɗo keeriɗo hooreejo leydi o, o wiy wonnde “Ɗum fof noon jibini ɗum ko golle ɗe Hooreejo leydi o Toowa teddungal Makki Sal waɗi he nder diiwal he.”
Mammadu Talla, holliri wonnde tawtoreede he dental he, denndaangal hoohowɓe dawrugol, yiɗɓe e yahdiiɓe, Kawtal BBY Maatam ene hollira mo Makki Sal suɓii o, ene hawraniɓe kamɓe fof.
O rowri wonnde “Ngol ɗoo denndinngol parenaasuuji ko maale laaɓtuɗe wonnde, he jamma 25 Colte 2024, maa Maatam waɗno aadorinoo ni, so rokkude 95% e daaɗe mum en kanndidaa Aamadu Bah, tawa kadi ko wonndude e keewal mawngal arɓe suɓaade. Kadi wonaa ɗoo he diiwal hee tan haaɗata, kono maa yah haa Ndakaaru, sabu dawriyankooɓe Maatam ene njogii toon yimɓe heewɓe heɗaniiɓe ɗum en,nananooɓe ɗum en.”
