Ko ñalnde Aaɓnde 21 Seeɗto, ene hawri he Altine Pak (paque) saanga 7:35 mawɗo eglis katolik, Pape Francis yalti aduna tawi omo yahra he duuɓi cappanɗe jeetati e jeetati (88).
Francis mo innde mum tigi-rigi ko Jorge Mario Bergoglio, iwdi mum ko Arsantina, ko kanko woni Pape gadano jeyaaɗo he leydi Amerik latin gardiiɗo yuɓɓo diine katolik en. Ko hono noon ne kadi ko kanko woni jeyaaɗo he waalde Jesuit en gaddiiɗo ardaade eglis katolik. O ardiima eglis katolik fotde duuɓi sappo e ɗiɗi. Ko caggal nde Pape Benedict XVI (Joseph Alois Ratzinger) dimosini, o suɓaa ñalnde 13 Mbooy 2013.
Ko hannde Hoore-biir (Aset) 26 Seeɗto o wirnaa, e tawtoreede hilifaaɓe heewɓe ummoriiɓe he leyɗeele keewɗe ceertuɗe. Ene jeyaa heen hooreejo leydi Amerik Donald Trump e joom suudu mum Melania, Joe Biden hooreejo Amerik kiiɗɗo o, kadi mo diine mum ko katolik, Prince William mo Angalteer e 170 hilifaaɓe, lomtiiɓe leyɗeele mum en arɓe ngam hawrude he wirwirnde oon lollirnooɗo Baaba (Pape) miskineeɓe.
Maayde Pape sikke alaa,ko joljole mawɗe he nder eglis katolik, gila e heblande ubbegol makko haa e suɓaade lomto makko, hay so tawii Pape Francis kanum wasiyii ko yoo wirwirnde mum hoybine (o wiy ko yo o waɗe he kees leggal kadi o ubbee he ngaska ka alaa maantoode) ne, wirwirnde ndee wonaa ko waawi famɗude sabu keewal hilifaaɓe nootitiiɓe heen ɓe.
Paap en keewnoo ubbeede ko les Basilik (Juulirde) St Peter, kono Francis kanum suɓii ko ubboyeede juulirde Santa Maria Maggiore wootere he juulirɗe mawɗe Rom.
