He nder haalannde raɓɓere saaktaande he kabrirɗe Amerik, Donald Trump anndinii wonnde diwooje B-2 Amerik njanii he nokkuuji tati mawɗi tafooji nukliyeer he e nder leydi Iraan, ko adii nde weetata ñalnde Dewo(Alet ) waktu nokku oo. Hooreejo leydi Donald Trump wiyi wonde njangu ngu « momtii » nokkuuji ɗii, kono haa jooni ardiiɓe konu Amerik ina njokki laaɓsindaade rewam njangu nguu ɗo tolni. Ɗuum woni mbele ɓe keɓii heen sagooji maɓɓe walla alaa.
He « Operation Midnight Hammer », hono no njangu he Iraan nguu inniraa ni, bommbooje B-2 timpiima ko ina ɓura sappo e ɗiɗi bommbooji mawɗi « bunker-buster » e dow nokkuuji Iraan biyeteeɗi Fordow e Natanz, tawi he ngaan tuma misilaaji Tomahawk ene toɓa he Isfahan, e wiyde limto Amerik e njangu nguu.
Teheran ñiŋii Amerik e Israayiil he batu keñoraangu ngu Fedde Ngenndiije Dentuɗe jooɗinoo, ndi hollitii sikkitaare mayri he baawgol dipolomasi laataade he kaaɗoo ngonka. Aduna o fof ene heɗtinoo he jaabawol laaɓtungol ummoraade e hooreejo dowrowo leydi ndi hono Ayatollah Ali Khamenei.
Naatogol Amerik, he hare hakkunde Israayiil e Iraan waɗi ko caggal nde leyɗeele ɗiɗi ɗee ngostondirii piyanɗe ko ene wona yontere. Israayiil puɗɗuɗo njangu nguu o, tuumi iraak ko tafde bommbooje nukliyeer, hayso tawii Iraan kanum wiyii nukliyeer mum en tafiraa ko ngam faggitaade yakawere nde ene huutoraade he geɗe siwil, ko wayno kuɓɓam.
Donald Trump sappiima Iraan wonde so yiylaaki jam Amerik ene waawi waɗde toon njanguuji goɗɗi, kadi nii hay waylude laamu nguu jommbaani.
Luurondiral he nder lannda Republikyankooɓe
Pellital Donald Trump yande he Iraan jibinii luural hay he nder lannda makko Republikyankooɓe, teeŋti he waalde MAGA, ɓurnooɓe wonde yimɓe makko.
Depitee Republikyanke Marjorie Taylor Greene, sehil Trump tiiɗɗo, ñiŋii gollal hooreejo leydi ndii hono yamirde timpogol bommbooji e nokkuuji nukliyeer Iraan, oon winndii he ɓayyinaango mum he X (twitter) he jamma Hoorebiir, tuman de fiyaaku nguu yani nde. “Bommbooje caamataano he dow koye Israayiilnaaɓe so Benjamin Netanyahu adanooki timpaade bommbooje he dow Iraannaaɓe. Ndee wonaa hare men, ko jam woni jaabawol ngol.” Sarɗiyanke dowla Georgia o winndi. Kaaɗoo haala ene hollira luurondiral hakkunde yiɗɓe Donald Trump hono waalde MAGA. Thomas Massie Sarɗiyanke (congressman) dowla Kentucky kanum ne jeyaaɗo he lannda Republikyankooɓe, wiyi ko Trump waɗi koo ene luutndii doosɗe dowlaaji Dentuɗi.
