21 Cote ko ñalawma keertanaaɗo ngam mawninde ɗemɗe neenewiije. E nder batu mum jooɗinoongu e lewru jolal (novembre) 1999, UNESCO (Fedde Ngootaagu Dowlaaji ngam Nehdi, Ganndal e Pinal) nanondirii e waɗtude 21 colte Ñalngu Winndere Ɗemngal Neeniwal. Tuggude he hitaande 2000 ñalngu ngu ene mawninee e nder leyɗeele aduna ɗe kala. Fayndaare UNESCO ko hirjinde e paamgol darnde ɗemngal e nder pinal aadee.Ɗemngal ko kuwtorgal ɓurngal doolnude e hatojineede ngam deengol donaaɗi e ƴellitgol pinal aade. Kuwtorogol ɗemngal neeniwal ngam nehde sukaaɓe leñol e ƴellitde ganndal ko jojjannde kala leñol.
Toɓɓere faayiida ɗemngal he nder nehdi (jaŋde), ko toɓɓere duketeende gila nde leyɗeele Afrik, Asii, e Worgo-Amerik (Amerique du Sud) gonnooɗe he les njiimaandi koloñaal keɓti ndimaagu mum en dawrugol. He wallifannde nde UNESCO yaltini gila 1953, ene teeŋtina faayiida nehde sukaaɓe he ɗemɗe mum neenewiije. He ciimtol winndereyeewol ngam rewindo eɓɓande “Nehdi ko joojannde mo woni kala”, (education pour tous) ngol UNESCO yaltini he 2005, ene teeŋtina wonnde ɗemngal ngal leydi (renndo) suɓii ngam waɗde jannginirngal, e dawrugol mum ɗemɗiyankeewol he nder jannginirɗe ene jogii rewam mawɗam he moƴƴugol jaŋnde ndee e jahrugol mayre yeeso.
Ko ene wona hikka duuɓi 70, gila nde wallifannde UNESCO arawannde ndee yalti (1953), binndannɗe goɗɗe keewɗe e defte keewɗe mbinndaama he ko yowitii he toɓɓere nde; batuuji keewɗi njooɗiima, kadi nanondire keewɗe e wasiyaaji keewɗi mbaɗaama heen; jarribooji keewɗi kam e annduɓe fanniiɓe tabitinii ɓural mawngal gonngal e huwtoraade ɗemɗe ngenndiije (neenewiije) nokkuure ndee ngam jannginde (nehde) renndo mum en. Kono ɗuum fof haɗaani, leyɗeele Afrik nana njokki huwtoraade ɗemɗe leyɗeele jiimnooɗe ɗum en ngam jannginirde e waɗde ɗum en liggorɗe he nder kala gollorɗe laamuuji leyɗeele mum en. Aduna Allah oo hannde, haa fiiltii, ko he jookdu Afrik tan sukaaɓe puɗortoo jaŋde tawa ko he ɗemngal ngal ɓe nanataa.
Ndeen dee wonaa jookdu Afrik tan meeɗi jiimeede. So en ƴeewi ma en njiy leyɗe Orop jiimnooɗe Afrik ɗee kala ngonnoo adan ko he njiimaandi Gerek e Rom, kono nde ɓe cortii he njiimaandi ɗeen leyɗeele ɓe ƴelliti ɗemɗe maɓɓe diiwanyankooje, woni neeniije maɓɓe ɗe ɓe kaalatno he nder diiwe maɓɓe walla mbiyen leyɗeele maɓɓe. Ko wayno ɗemngal Almaare, Faransinkoore, Engeleere, ekn. Hannde he nder Orop, hay leykel ɓurngel heen famɗude, yimɓe mum njanngata ko he ɗemɗe mum en kadi ko ɗuum liggortoo haysinno ene kuwtoroo ɗemɗe goɗɗe ngam jotondiral caggal leydi. Woon heen boom ene njannga ko ɓuri ɗemngal gootal ngam haa mbaawa reende hurum kala ɗemngal leydi ndii e rokkude kala heen leñol e leñɗi leydii jojjannde mum. So en ƴetti yeru he Suwis walla Liksammbuur, heen wootiri kala maa won ɗemɗe tati ene njangee heen.
So en ƴeewii leyɗee Asii ɗee kala alaa heen ndi meeɗaani wonde he les njiimaandi, kono haɗaani nde keɓti ndimaagu mum en dawrugol ndutti e ɗemɗe mum en. Afrik, wonande heen leyɗeele ɗo Islaam yaaji sari ɗee, joom mum en nana njannga ɗemngal Arab maa won duuɓi ujununere, kono haa jooni hay faamu men he Islaam ene fenngiɗi.
Janngude ɗemɗe Oropnaaje, ngaddanaani en ɓataade.
Afrik ene hatojini e ƴettude pellital dawrugol ngam rimɗinde ɗemɗe mum; njanngina ɓiyɓe leyɗeele mum en he ɗemɗe mum en neeniwiije. Keewal ɗemɗe fotaani wonde paddal. Sabu hono no mbiynoɗen ni, Liksammbuur woni leydi ɓurndi famɗude he nder Orop ene janngina ɗemɗe nay, Faransinkoore, Almaare, Liksammburnaare e Engeleere. Almuudo o waawa heɓde seedanfaagu mum duɗe hakkundeeje tawa waawani ɗemɗe maɓɓe tati ɗee kala, woni Faransinkoore, Almaare e Liksammbuurnaare.
Ndee ɗoo winndande ene nokki e binndanɗe men jawtuɗe: 21 Colte, Ñalngu Winndere ɗemngal neeniwal e Afrik Ɓamtortaako he Janngirde Ɗemɗe Janane.
