Cukkoo hooreejo Dowlaaji Dentuɗi, Kamala Harris yilloyimaa hannde leydi Ghana, to o fuɗɗorii njillu makko jogorngu neeɓde hakke balɗe jeeɗiɗi he nder jookdu Afrik. Caggal Ghana, ma cukko-hooeejo DD o, yillo Tansani e Sammbi.
Ende o yettii to teerirɗe laaɗe diwooje lamorgo leydi, Akraa, ko sukaaɓe janngooɓe e diɗɗe amooɓe njaɓɓiimo toon. Woni sabaabu njillu nguu ko sabu yiilaade tiiɗnude jokkondiral hakkunde leyɗeele Afrik e Amerik. “Miɗo jogii weltaare no feewi he sooynande nde njogiimi he janngo Afrik,” cukko-hooreejo Dowlaaji Dentuɗi wiy, tuma nde o naati leydi Ghana.
“He min cooyni he nguuɗo njillu nde nggu wonata ɓeydogol hollirde yiɗde amen jotondiral juutngal paayodingal kadi e cehilaagal hakkunde yimɓe Dowlaaji Dentuɗi, e ɓeen wuurɓe he nduu jookdu.” Harris wiy.
Ene feeñi he yeeso Harris weltaare, nde ene teskee he moosaali makko, kadi he fawde junngo makko he dow ɓernde makko he tuma nde o wirtatoo sukaaɓe weeynooɓe araaraayuuji leydi Ghana e mo Dowlaaji Dentuɗi ene mbewla, ene naayo, yantude e diɗɗe amooɓe ngameeje ganniije ɗe ɓe njaɓɓoriimo saanga nde o tellii he ndiwoowa makko air force2.
Harris maa jooɗodo e Hooreejo leydi Ghana, Nana Akufo-Addo hannde Altine, kadi ene njoortaa maɓe ndardo ngam huccitde e jaayndiyankooɓe. He ndeen joɗnde ene yaakoraa maɓe njeewtu ko yowitii he kisal e ndeenkam kam e faggudu.
Ardiiɓe ɗiɗo ɓee meeɗi jooɗodaade ko adii ngol ɗoo, kono lawbi ɗiɗi ɗii kala ko Washington wonno. Arwannde ndee ko 2021, he ngaan saanga Nana Akufo wiynomo, “caɗeele amen- kadi ɗuum woni caɗeele kala leyɗeele yiɗɓe ɓamtude mahanteeje demkarasi he nder jookdu amen- ko deeƴnude ɓerɗe yimɓe amen e hoolnude ɗum en wonnde mahanteeje demokarasi ene mbaawi wonde daabaa mo ene safra soklaaji maɓɓe ɓurɗi mawnude. Ɗuum firti ɓamtaare faggudu nde ene itta baasal he nder jookdu he.”
Nguu ɗoo njillu njuutngu saabi ɗum ko yiɗde weeɗde ardiiɓe Afriknaɓe ɓee junngo ngam faddaade kuwtondiral e Siin (Chine) he nder jookdu he, ngal ngannduɗaa ɓeydiima yaajde he ɗiiɗo duuɓi jawtuɗi, rewrude gollondiral maɓɓe he laamuuji Afrik to mahanteeje e telekonikasiyoŋ, haa ñamlude kaalisaaji, So en ƴettii yeru Ghana, ɓe nanondirii e golleyankoore Siinnaaɓe wootere wonnde mahtoo lawbi maɓɓi, tawa njaru nguu ene wona milliyaaruji 2 dolaar, kamɓe ne ɓe udditana ɗum en oogirɗe maɓɓe almiñoŋ.
