Gine, Alhajji Usmaan Fatako BALDE, wirnaama hanki, Mawnde (Aljumaa) 31, Mbooy to wuro mum en Fatako. O faatinooma gila ñalnde 27 Mbooy to Konaakiri, laamorgo leydi Lagine tawi omo yahratnoo he ɗuuɓi 84. Gila hitaande 2019 ko kanko ardiinoo Dental Fulɓe e Haali Pular’en Gine. Alhajji Usmaan Fatako Balde, ko galo, jooma jawdi, ganndaaɗo no feewi he nder leydi Lgine. Omo tawanoo e luutndiiɓe happu tataɓo mo Alfa Konnde hooreejo Gine Kiɗɗo o laatinno. Sabu ngool luutndagol addaniino oo-ɗoo hooreejo Dental Fulɓe e Haali Pular en Lagine, kadi gooto e hoohooɓe Fuuta Jaloo caɗeele mawɗe.
Usmaan Fatako Balde, ganndiranooɗo waccoore mum “san-loi” woniino hooreejo suudu ngenndi ngam njulaagu, mbaylaandi e fitram-gollaagu Lagine (Chambre nationale de commerce, d’industrie et de l’artisanat-CCIAG). Ko o julanke galɗuɗo mo ñiiɓirde mum wonno Konaakiri, kono kadi joginooɗo gollorɗe to Ndakaaru e New York. Omo joginoo jokkondire business tiiɗɗe he nder adunaaru he kala. Ko hedde 1980, o fuɗɗii jokkondiral makko e Florentin Duarte, gardinooɗo kompañi Philip Moris he Afrik Bannge hiirnaange e hakkundeere, jooɗinooɗo to Dakaar, Senegaal. Ko ngaal jokkondiral addanimo naatnudo marke sigirat keewɗe he nder Lagine e leyɗeele Afrik goɗɗe.
Hakkunde Usmaan Balde e laamuuji Lagine ko wulataa-ɓuuɓataa, nde tawnoo o fuɗɗiima dañde ngalu gila he laamu Seyku Tuure tawi omo woni Gekkedugu omo yeeya sigirat kadi o naati he njeeygu bagiiji. He sahaa Lansana Konte kadi o ɓeydii udditaade, o naati he njeeygu simoŋ e mahde jeereeji to saare Labe. Caggal ɗuum kadi, nde tawnoo o ɓiyɗo Fatakonaajo ko jooma hoodere, Allah udditanimo kadi damal jogaade njeeygu werlaaji Pick-up Isuzu he nder leydi Lagine, kono he laamu Alfaa Konde ɓe keɓti ɗuum he juuɗe makko, ko nde Mamadi Dummbiya ari ndee tottitimo nguun njulaagu.
Alhajji Usmaan Balde ko balatnooɗo no feewi, kadi diineyanke. O mahii wuro maɓɓe, Fatako, Jumaa mawɗo, ɗuum ene seeɗtoo nanngitaade makko he diine makko e iwdi makko.
Pulaaronline.com ene duwanoo ɓesnguure makko, musiɗɓe makko e Fulɓe winndere ndee kala he ngal baasal. Yoo Allah moƴƴu he makko, hinnoomo/yurmeemo.
