Hajja Jene Kaba jooma suudu, hooreejo leydi Gine kiiɗɗo o, Alfaa Konnde, maayii hannde Hoorebiir 8 Seeɗtoto, to Paris, leydi Farayse. Saakti kabaaru oo ko Guineenews.org, lowre Ginenaare saaktoore kabaruuji. Ɓe kaalaani noon ko saabi maayde makko. Kono ɓe mbiy ɓe njokkondirii e koreeji makko tabitinii kabaaru o, ko hono noon kadi hello makko facebook ne ene saakta kabaaru o.
Sellu Dalen Jallo, hooreejo lannda UFDG, luutndiyanke kaɓotonooɗo Alfaa Konnde, kanum ne jippinii winndannde he hello mum facebook ngam yettinde duwaaw mum he ndee sankaare. “Ɓernde am heewii njurum tuma nde nanmi he ndee ñalnde Hoorebiir 8 Seeɗto, sankaare Hajja Jene Kaba Konde, Jeewo leydi ndi kiiɗɗo o. Miɗo yettina duwaawu am fayde he jooma galle makko, Hooreejo leydi ndi kiiɗɗo o, Alfaa Konnde e ɓesngu makko e denndaangal Ginenaaɓe. Yoo Aljanna Firdawsi won hoɗorde makko.”
