Bamako, Mali he wiyde Dokteer Brahima Dikko gooto e hooreeɓe suudu safrirdu mawndu he Bamako ko ɓuri yimɓe 600 mayii toon, tawi sabaabu o ene iwri he banngeeji ɗii kala. Omo wiya ɗen maayeele mbaɗi ko e lewru go’oɓiiru, ɗiɗaɓuru e tataɓuru ndee hitaande ɗo. Oo yeesoojo anndinii wonnde ɗum fuɗɗii ko ɓaawo fuɗɗagol woppere golle e wasde welltaare ñawndooɓe ɓe. Dokteer Brahima Dikko ko he nder cimtol o anndini laamu nguu ko fewndii he nduu ñawndirdu. Omo wiya kadi wonnde nduu suudu no fay to hulɓinii. Ɗuum ko sabu ɗuuɗugol jokkondir ngol ɗee maayeele he nduu safrirdu. Dokter Brahima Dikko wiy wonnde hay so eɓe etoo yoo won heen e golle tokoose mbaɗe ne, yimɓe arooɓe sabu safaaraaji keñoraaɗe ɓee ene keewi. So en tuugniima he RFI Fulfulde, gooto e ɓeen seedtiiɓe mo yiɗaa innde mum haale, wiy “Omo feli ardiiɓe Malinaaɓe halfinaaɓe cellal ɓe he ɗii boneeji.”
Eɗen ciftina tan, sabu waasde nanondiral hakkunde sanndikaaji daraniiɗi safrooɓe ɓee e laamu nguu, waɗi gila e darorɗe hitaande ndee safrooɓe ɓee ene ngoppa goole sahaa fof, kadi kala nde ɗuum waɗi ñawɓe ɓee ene loroo sanne, haa woon heen ene mbaasa heen pittaali mum en sabu waasde toppiteede. Eɗen ciftora Hopitaal Point-G kanum ñawndooɓe mum noddiino he woppere golle nde alaa ɗo haaɗi gila ñalnde 6 Colte, 2023, ko hono noon ne kadi Hopitaal Gabriel Tuure, kanum ne noddiino e woppere golle gila Aaɓnde 13, Colte. Gila ndeen kadi termondiral hakkunde sanndikaaji ɗii e laamu ngu ronkaama yoo ɗiggu tawo.
