Songlines, jaaynde Biritani fanniinde he ko yowitii e gaaci (misik) habrii wonnde jimoowo Malinaajo o, Ummu Sanngare nawii kawgel maɓɓe “Best Artist Award” mo hitaande 2023. Jaaynde ndee habri ɗum ko he lowre maɓɓe songlines.co.uk.
Caggal nde oon kabaaru yalti, dewbo Waasulunaajo jimoowo dowluɗo o, winndii kanum ne he hello mum facebook, ngam hollude weltaare mum e jaarde yiɗɓe (fans) mum.
“Miɗo weltii kadi ko teddungal mawngal wonanimi nawde kawgel naalanke ɓurɗo kelɗude mo Songlins Music Awrads sabu album am “Timbuktu”. Miɗo jaara fiilooɓe gaaci (record label) am ɓe, World Circuit, he ballal maɓɓe he am duumingal, kadi e Songlines Magasin, e kala naggunooɗo heen haa ɗum waawi moƴƴude.
Ummu Sanngare ko jimoowo lolluɗo he nder adunaaru he sabu makko welde daande kadi e daranaade ɓamtude pinal Afrik e gaaci mum, rewrude he jimɗi e ngameeje finatawa Waasulu en. Kono kadi ko daranooɗo jojjannde rewɓe, huunde heewnde jeyeede e ko o yimata.
Hayso ɓamti Ummu Sanngare ko jimɗi mum finatawa e hollirde ngamri e gaaci Waasulu en ne, caggal mum o waɗti jillondirde he ɗiin gaaci misikaaji goɗɗi, ko wayno nde o yimidi e jimmowo Ameriknaajo o, Alicia Key walla nde Beyonce reftii huunde e jimol makko “Jarabi Neenee” he nder filma Lion King.
Kono ko he album makko “Magoya” he 2017 ngaal jillondiral gaaci, hakkunde hoddu e horde Afriknaare e gaaci elektirika ɓuri seedtinde. Ɗuum ɓeydii-mo cuucal jokkude he ngoon felo gaaci, ko ɗuum jibin album makko “Timbuktu” mo ngannduɗaa ene jillondiri konngugol Afriknaawol ganni e Blues, kadi e huundi baaruuji rock.
