Ko he nder galle geñgol Ɓuuɓa Ndiyam he nder Labe, kawrital mawngal waɗi hannde Hoorebiir 22, Morso 2023, ngam mawninde ciifgol deftere joyaɓere winndaande he nguurndam o toowa ganndaljo, jannginoowo fanniiɗo Alhajji Ibraahiima Kaba Bah. Yuɓɓini ngaal kawrital ko taani makko Aysatu Bah ummoriiɗo to Kanada tawi kadi ko he tawtoreede toowa ganndal en e wallifiyankooɓe Laginenaaɓe e Fuuta Jalonnaaɓe heewɓe yantude e ɓesngu makko, kanko Ceerno Ibraahiima Kaba Bah.
Ndee deftere joyaɓere he nguurndam Ibraahiima Kaba Bah, winndi ɗum Ali Ben Kamara tawa muuli nde ko ko galle muulngo YIGUI.
Yimɓe heewɓe ɓamii konnguɗi, gila e wallifiyanke o Ali Ben Kamara, e juɓɓinɗo kawrital ngal o Aysatu Bah, yimɓe galle makko, tawtoranaaɓe laamu nguu e annduɓe mawɓe ko wayno Mawɗo Bonataa Jeŋ, kanum en fof ceedtiima ko heewi e Ibraahiima Kaba Bah.
Ndeen deftere, nde ngannduɗaa ko Ceerno Moneenembo winndi ngardiindi mum, ene jaŋtoo hol gonɗo Ibraahiima Kaba Bah. Jibinaaɗo to saare Labe he nder Fuuta Jalon. Caggal jaŋde teskinnde he duɗe leslese e hakkundeere he nder Lagine, ko adii jeytaare, o yahi Senegaal caggal ɗuum o ummii ɗoon o fay Farayse o jokkoyi jaŋde makko to wuro Nancy. Caggal nde o gasni jaŋde makko o waɗti jannginde, kono sabu yiɗnoode leydi makko Lagine naftoroo ganndal makko o felliti artude he leydi makko, kono, hono kadaruuji Fulɓe heewɓe walla nii mbiyen nii kaadaruuji Ginenaaɓe tan, leelani laamu Seyku Tuure waɗtimo e añɓe tuumaaɓe, he dow fenaande, jeyeede he maalde ngam yiɗde solde laamu mum, haa o sokoyaa to Camp Boiro.
Ibraahiima Kaba Bah ko jannginoowo Fisik (professeur de Physique) ko kanko kadi wonnoo hooreejo (directeur) ecole normal de Kindia. Ko o tergal kadi gooto e hooreeɓe waalde jannginooɓe he nder leydi Gine (Syndicat des enseignents). He 1961 nde sukaaɓe janngooɓe ɓee mbaɗi seppooji ngam hollirde mettere mum en he Seyku Tuure, laamɗo canndallo o soki duɗal ngal he hujjiniraade wonnde dillere sukaaɓe ɓee ndee saabii ɗum ko maalde jannginooɓe ɓe. Ibraahiima K. Bah nanngaa o sokoyaa to Camp Boiro (wiyetenoo ko: Camp de Camayenne). O sokdaa toon e mawɓe waalde jannginooɓe ndee ko wayno Keytaa Kumannjan, caggal ñaawoore fuunti-funeere ɓe taƴanaa duuɓi jeegoom dummbere. Ndeen ñaawoore fenaande kadi jibini laawgu mawngu sukaaɓe janngoɓe ɓe he nder leydi hee kala, kono Seyku Tuure e laamu mum, huwtorii ko wonno njogitaari mum ko, ɗuum woni sokde, warde, e fiyiide haa ɓakkoo he dow ƴiiƴam mum.
Caggal nde o lelii duuɓi jeegom he nder dummbirde Camp Boiro, Ibraahiima K. Bah yalti he 1966, o faytiraa duɗal polytechnique ngal Kankan yo o jannginoy toon. He 1971 kadi nanngaa he dumunna daɓɓo o woppitaa. Ko ndeen o arti Labe caggal maayde kaaw makko Seyku Balde gonnooɗo arɗo Nduyeeɓe to Labe.
Ibraahiima Kabaa Bah wallifiima defte keewɗe he ɗemngal Pulaar, kadi firii defte wallifiyankooɓe Faraysenaaɓe he Pulaar.
