Ñalawma gooto tan caggal nde mawɗo lannda Pastef o dartini geddere mum ñaamdu, o artii he layti-renndo (reseaux socieux) huunde nde o wayri waɗde gila nde o dummba he nder galle makko. Konngol makko gadanol ko duwanaade yahooɓe maggal ɓe, rewrude ɗo mum en, kala Senegaalnaajo e kala juulɗo, yoo Allah waɗ ɗum en he laawol jam e kadi yoo Allah jaɓan ɗum en dewe mum en Allah. Hono no o winndiri ɗum he ɗemngal Jolfe. “Yoonu jàmm !Màggalug jàmm !Sunu BOROOM nangul ñépp!”
Eɗen ciftina tan Usmaan Sonko ko hanki dartini geddere mum ñaamdu nde o fuɗɗinoo gila 30 Morso (Juillet) caggal nde o nawaa dummbirdu Sebikotan. Habri ɗuum ko Alhajji Maalik Njaay, kalfinaaɗo konngol lannda Pastef he ɗerewol mum facebook, e X (twitter), kadi kabaaru o naldaama Agence France Press (AFP) kono aldaa e hay yaajnaare wootere e hol ko jey sabaabu mawɗo lannda Pastef ƴetti ngaal pellital dartinde geddere mum. Me Bammba Siisee gooto e ndanndantooɓe (hujiyanke) makko kanum teeŋtinii oon kabaaru kanum ne he APS. Ene anndaa tan seernaaɓe leydi ndi e mawɓe diine en heewɓe rokkaaɓe hurum mbaɗiino eeraango fayde he makko ngam yo o dartin geddere makko he tuma nde yimɓe lannda makko kanum en ngonno e noddude wonnde yoo laamu ngu woppitmo gila alaa ko heɓimo.
