Muritani: Kajjata Maalik Jallo, sarɗiyanke kadi tergal he Kawtal Yaakaare Muritani (Coalition Espoire Mauritanie-FRUD) seyfitii nanondiral ngal lanndaaji ɗiɗi luutndo UPF mo Wuldu Mawluud e RDF mo Ahmed Wuldu Daddah, mbaɗdi e lannda laamu o woni ISNAF. O hollirii wonnde ɗum ko jamfaade luutndo ngoo, e etaade jiiɓde hakkillaaji yimɓe ɓee, kadi maa haɗ kaaldigal goongɗungal aaɓnaade, tawa ko kaaldigal ɓamdangal hakkunde lanndaaji jooɗanaaɗi to suudu batirdu ngenndi to, dawriyankooɓe ,e semmbeeji guurɗi leydi ndi.
Ko ɗum woni haalannde makko:
UFP e RFD, eɗen ciftora, ngaybiniino njeñtudi suɓngooji cakkitiiɗi ɗii rewrude he sepooji he dow mbeddaaji, ɓe ɗaɓɓi ɓaɗtugol suɓngooji ɗi, ɓe njahii haa ɓe ɗaɓɓi e sarɗiyankooɓe lanndaaji luutndo ɓe nde ɓoorotoo manndaji mum en ngam waawnude laamu nguu ruttanaade suɓngooji ɗi. He oon tuma, ndeke, tawi ɓe nanondirii e laamu nguu, nanondiral ngal ɓe cuuɗi luutndo heddiingo ngoo.
Ndeke eɗen mbaawi wiyde, ngalɗoo nanondiral he ndiiɗoo mbaydi, ko jamfa pewjanaaɗo luutndo ngo, ko feere ngam wujjude hakkillaaji yimɓe. Ɗum ɗoon noon koko telɓinoyta kaaldigal nuunɗungal ngal luutndo ngo e denndaangal dillooɓe he dawrugole kam e semmbeeji guurɗi ngenndi ndii kala poti tammbodaade
Loowdi ndii kadi ine jiiɓa yimɓe : so laamu e luutndo nanondirii e sifaa ngonka leydi, nanondirii boom e tuugnorgal golle gootal, jotondiral mum en fotaani wonde hankadi jotondiral hakkunde luulndo e laamu. Hankadi ɓe ngontii yahdiiɓe, rennduɓe haɓɓere. Ɗuum ine foti laaɓde.
Ndeeɗoo darnde noon alaa ko ɓeydata so wonaa lohnude luutndo ngoo , wemjina ɓesngu ngonngu hannde e caɗeele nguurndam Pantuɗe.
Eɗen njiɗi faamde hol ko gooto e maɓɓe kala yiylotoo e ngal nanondiral kaawningal, ɗo heen senngo kala woni e ƴaañde woɗngo ngoo. Hol ko ɓe njiɗi waɗde ?
Laamu ngonngu e joofirde happu (manndaa) mum mo alaa hay seedantaagal gootal moƴƴal ngal waawi hollude muritaninaaɓe, ine yiyloo dagnoraade partiiji gonnooɗi ndeen maande luuntdo, kono hannde nattuɗi jogaade semmbe ngam jokkude darnde luutndiiɓe goonga e goonga. Darnde maɓɓe hannde ko etaade welnaade laamu ngu . Ngolɗoo laawol jilɓungol fuɗɗaamaa diideede ko ɓooyi seeɗa. Eɗen ciftora peeje kala ɗe ɗii lanndaaji njiylorinoo kaaldigal e laamu nguu. Laamu nguu ɗaminini ɓe ɗum, kono daasii ko ina wona duuɓi ɗiɗi, hade mum yaltude heen hay tintinde ɓe tintinaani ɓe. Ngolɗoo laawol kadi, eɗen padi yiyde ɗo ɗum joofanta ɓe kadi.
Kajjata Maalik Jallo
Sarɗiyanke Kawtal Yaakaare Muritani- FRUD
