Meeter Muusaa Joop, ene jeyaa e ko ene ɓura teemedde ɗiɗi ɓiyɓe Senegaalnaaɓe, worɓe e rewɓe, wiyɓe ene njiɗi ƴamde lefol hooraagu leydi Senegaal he suɓngooji tijjaaɗe he 2024 ɗi. Ngam waawde jeyeede he ɗiin suɓngooji ko adii fof ƴamoowo o ene foti heɓde kowal piccal jeegom e kowal piccal jeetati he nder teemedere (0,6 e 0,8 %) he nder winnditiiɓe he doggol suɓngooji defantooɓe ɗum (parrains) ngam waawa jeyeede e fooɗondirteeɓe lefol ngardiigu Senegaal. He ooɗoo sahaa eɗen nganndi dawriyankooɓe ɓee kala, gooto heen fof nana haɓɓi hirke mum ene yiiloo he nder leydi Senegaal ngam ɗaɓɓude defantooɓe ɗum ngam haa waawa jeyeede he ɗiin suɓngooji.
Me Muusaa Joop ne fuɗɗiima njillu mum kadi o adorii ko Fuuta, tawa kadi ko he falnde Podoor ɗo mbootu makko daasa ɗo. Nguun njillu maa nawmo he gure keewɗe he nder falnde he, kono kadi maa nawmo haa he nder diiwal Maatam so ɗuum gasii o wiy maa o yetto denndaangal diiwe Senegaal.
He nder naamndaali e jaabawuli ɗi hooreejo Dakaar Dem Dikk kiiɗɗo oo waddi he jokkondiraaɗo eMedia.sn to Podoor, Me Muusaa Joop hollirii weltaare mum he no njillu nguu fuɗɗorii ni. “Huunde ndee fuɗɗoriima no moƴƴi,” hooreejo And gor yi jotna, wiyi. “Yimɓe diiwal Podoor ene keppatnoo ko njiyatami. He mbaydi am wonde ƴamoowo lefol ngardiigu Senegaal, ko fotde am arde mi haalda e yimɓe ɓee, kadi mi haalanaɓe ko mbaɗmi. So wonii noon ko baɗɗo haa njiyɗaa fodan maa aɗa waawi ɗaminaade. Fuuta ene hatojini e yiyde gooto e ɓiyɓe mum ene woni hooreejo leydi, sabu gila 1960, so en koddirii Senegaal ko laana njoorndi, kadaruuji fuutankooɓe ko wagon-ji daasateeɗi tan, yontii nde eɗen ngona hoore daasoore. Miin miɗo yiɗi wonde hooreejo ngam hami waawa gollande leydi am, e naftude ɓiyɓe leydi am. He seeɗe mo meeɗnoomi resndeede o, mi hollirii heen wonnde komi nuunɗuɗo kadi ponndoowo.”
Dawriyankooɓe ene nganndiraa wonde muumooɓe haala, nde tawnoo ɓe mbiyata ko ɓe njiɗaa haygooto mettinanaɓe, kono Me Muusaa Joop kanum ko ngoongirante mo suggataa haalannde mum. He laaɓndal mbele ɗuum wonantaamo paddal, walla kam mbele omo sikki yimɓe diiwal Podoor ma njaɓ rewde e makko he kaan ngonka? O wiy tan ko so tawii kay eɓe njiɗi mbayliigu, sabu o yiy nokkuuji keewɗi falnde ndee, kono caɗeele mawɗe ngoni heen. Ngaal goongirantaagal o wiy, ko ɗuum addannoomo itteede he gollal makko Dakaar Dem Dikk, gollorgal ngal o gollii ko waɗi ngartam paayodinɗam. He ngaan saanga, sabu yiɗde makko e Podoor, wonaa nii diiwal, kono haɗaani o sosi toon ɗatol “Yah ngartaa” te ɗuum walli yimɓe fallnde ndee sanne, kadi ɓe njettiimo heen.
“Eɗen katojini e waylude jaɓɓal he no liggortoɗen. Sabu miin ko posto gooto ngardiigu kalfinaami, kono Senegaalnaaɓe fof hannde ene nganndi Me Muusaa Joop, sabaabu nde wonde ɗum gollowoowo poocciiɗo addanii ngaal gollorgal yahngartaa mbayliigu seedtiniingu. Wadde somi rokkaama he Colte 2024, wonde peccanoowo Senegaalnaaɓe geɗe mum en Fuuta ɗawetaake. Ndeke noon ko yimɓe ɓee ƴeewata mbele ɓe njiɗi ko jokkude tan e heddaade he ko wonnoo ɗoo gila 1960 walla e ɓe njiɗi ko hesɗi. Kono kadi ko hesɗi tawi koko hoolnii.”
Me Muusaa Joop siftinii wonnde Fuutankooɓe ene keewi wonɓe jaagorɓe e hooreeɓe gollirɗe toowɓe (directeurs généraux) kono alaa fof ko ɓeen mbaɗani Fuuta so wonaa rokkude tisetaaji (T-shirts) e yoɓde kaaruuji ngam yimɓe maɓɓe ndaña no njahri wootoyde.
Mbele maa Meeter Muusaa Joop waaw heɓde hoolaare Fuutankooɓe wonnde so ɓe ndokkiimo defaare, kadi ɓe mberlanimoomo karte ñalnde 25 Colte 2024 o wattaaɓe ɓinngel mooroowo? Ɗuum ko laaɓndal ngal jaabawol mum nana yeeso men, kono kanko kam o huulaani wiyde, daande makko dow, wonnde ko o kanndidaa Fuutankooɓe. Hayso tawii o wiy hooreejo leydi Senegaal foti wonde ko hooreejo ɓiyɓe Senegaalnaaɓe kala. Ngam teeŋtinde ɗuum, o wiy ene jeyaa e eɓɓooji makko so tawii o laamiima o nattat wonde hooreejo lannda ngam tabitinde ko o hooreejo Senegaalnaaɓe fof.
