Ñaawirdu Cedeao rokki laamu Senegaal ngoonga he dow lunndiyanke Usmaan Sonko. Ñaawooɓe ɓee liɓɓe ñaawoore mum hank Mawnde 17 Jolal 2023 to Cote d’Ivoir, kollirii wonnde “ hujjaaji Senegaal ndokki ɗii luutndaaki jojjannde aade, sabu laabi ñaawoore ndewaama kadi ñaawooɓe ɓee ƴettii pellital mum en.” So wayii noon, he biyɗe ñaawirdu Cedeao ndu “laamu Senegaal yaɓɓaani hay jojjannde Usmaan Sonko wootere.” So tawii koko yowitii he pusegol lannda Pastef ngol, tirbinaal o wiy ko” lannda kaa fusaa ko he tuugnaade he kuule nderiije fawaade he ciimtol jaagorɗo kalfinaaɗo geɗe nder leydi”.
Ngal pellital jibinii mettere e cekedele mawɗe wonande danndantooɓe (awokaaji) Usmaan Sonko, ko wayno Me Siree Keledoor Lih, kollirɗo he nder winndannde mum waasde mum weltaade: “ Suudu ñaawirdu nduu ñaawi wonnde hay jojjannde wootere Usmaan Sonko yaɓɓaaka, ɓe calanimaa-mo ɗaɓɓaande makko. Renndo leydi ngoo e caggal leydi fof ndewindiima ko waɗnoo ɗoo he Senegaal ko, no ngenndi (laamu) Senegaal gollorii, golle ɗe ngonaa neɗɗankooje ustooje ɗe ɓe pawi he dow Usmaan Sonko, e gaalɗi ɗi ɓe mbaɗi ene kurlii galle makko. So suudu cedeao nduu ñaawiri hono nii, ko heddii heen ko maa laamɓe diktaatoor en ɓee fof , caggal ko ɓenni, ngooloro hono no leydi Senegaal ndii ni, kadi ene tuugnoo he ñaawoore suudu ñaawirdu ndu.
Eɗen ciftina tan wonnde ko ndanndantooɓe (awokaaji) Usmaan Sonko, nawnoo haala ka to suudu ñaawirdu ndu cedeao ngam wullitaade wonnde jojjanɗe kiliyaan mum en ene njaɓɓa. Ene jeyaa heen, fuseede lannda makko e itteedemo he listeeji suɓngooji he. Usmaan Sonko mo ñaawoore liɓnoo tawi tawtoraaka, he jiɓru lollirnoondu “Affaire Sweet Beautė” ittanooma he listeeji sugngooji. Kono omo jokki wiyde ko o kanndidaa he suɓngooji 2024, ko ɗuum jey sabaabu to o woni he nder dummbirdu makko to omo jokki haɓeede mbele omo daña waawde jeyeede he suɓngooji ɗi.
