Ñaawirdu dowrowru (Cour suprême) mo Senegaal momtii ñaawore Sabasi Fay, biynooɗo wonnde yoo Usmaan Sonko waɗte he doggol suɓɓngooji kadi tottee liste mum defanaare (parrainage). Kono kay, ñaawirdu dowrowru nduu, he gardagol hooreejo mum Siree Aali Bah, wiyko yoo laamu nguu e Usmaan Sonkoo fof njah njooɗoyoo, pada he ñaawoore tirbinaal mo Ndakaaru (Tirbunal de grande instance hors classe de Dakar). Ko ndeen laaɓata mbele maa Usmaan Sonko waaw jeyeede he Suɓngooji Colte 2024.
Ngal ɗoo pellital ngal ñaawirdu dowrowru nduu ƴetti ene nanndi he kawgu, wonande yuɓɓo ngenndi (l’agent judiciaire de l’Etat) nawnoongo haalakaa to ñaawirdu dowrowru to, caggal nde ñaawoowo Tirbinaal mo Sigaacoor o, Sabasi Fay, rokki yamiroore yo Usmaan Sonko waɗte he doggol suɓɓngo.
Ngal ɗoo pellital kadi semmbinii yuɓɓo halfinaango suɓngooji (Direction générale des élections- DGE), he salaare mum tottude nelaaɗo meer mo Sigaacoor o, liste defanaare, tuugnaade ɗum he wonnde oon (Sonko) innde nun alaa he doggol suɓotooɓe, te ɗuum ko sarɗi gadano waawde ƴamde lefol, sabu mo alaa jojjannde suɓaade waawaa suɓeede.
Eɗen ciftina tan kampaañ ngam heɓde defantooɓe (des Parrains) ene hebori gasde he nder balɗe seeɗe garooje, kadi dat dottaaɗo ngam waawde naatnude kanndidaayaagal mum haaɗata ko he nder Lewru Bowte (Decembre). Tuugnaade he ɗuum fartaŋŋe Usmaan Sonko waawde jeyeede he kanndidaaji suɓngooji 2024, nana ɓeydoo saɗtude. Sabu jooɗaade ñaawirdu Ndakaaru nduu ko adii gasgol kampaañ njiilaw defotooɓe o wonaa ko tijja. Danndantooɓe (awokaaji) Usmaan Sonko en ɓee ene paami ɗum. “Ñaawoowo o jaɓaani ɓamde pellital mum, o nawtii haala ka to tirbinaal mo Ndakaaru”, haamtii gooto e danndantooɓe Usmaan Sonko, Meeter Babakar Ñaŋ. Kono Me Sa’id Larifu, ummoriiɗo leydi Komoor (Comres) kanum ene jogii njoorto moƴƴo sabu o wiy: “He min ɗaminii maa huunde ndee ñaawe he balɗe garooje ko ɓooyata.” Kono yoga e maɓɓe, ko nanndi heen e Me Siree Keledoor Lih, ene cikki daawal ngal ene raɓɓiɗi ngam dañde fartaŋŋe waɗteedemo he listeeji suɓngooji he.
