He yontere yawtunde ndee, ñalnde Njeslaare (Alarba), kanndidaa lannda PUR he suɓngooji 2024, yilliima falnde Welingara, diiwal Koldaa, wonndude e sate mawɗo. He nder nguun njillu Aliw Mammadu Jah, juuriima Ceerno Aamadu Tijjaani Bah, Kalifa dental Madiina Gunaas, e denndaangal hilfaaɓe diine e aada wonɓe he nder falnde Welingara. Caggal ɗiin juuraali ƴettuɗi ñalawma kuurɗo, kanndidaa lannda PUR o, yettoyiima jamma to ñiiɓirde lanndaka, taweteende to Centre 2 mo Komin Welngara, o tawi toon militaaji makko e yiɗɓe makko ene cabbiimo.
Aliw Mammadu holliiri weltaare mum, kadi o jaari ɓe, kamɓe e denndaangal yimɓe ngure Kaasamaasa ɗe o adinoo yettaade. “Miɗo jaara denndaangal yimɓe Kaasamaasa he jaɓɓule maɓɓe tedduɗe ngila min naati he ngooɗo senngo he leydi he”. O layi. Caggal nde o suuti heɗɗaawo e holko jogori wonde porpgaraam makko, kanndidaa lannda PUR o fodii ma waɗ Welingara, saare ɓurnde labeede he nder Fuladu, sabu ko nde saare ɓadiinde keeri men tati ɗii kala: Gambiya, Gine Bisaaw, e Gine Konaakiri, ko nde saare faayodinnde sabu nde woni ko ɗo boli pottitta. “Ma min mbaɗ ndee ɗoo saare oogirde faggudu.” O fodani yimɓe heɗotonnoɓe mo. Kono o haaɗaani ɗoon tan, sabu o siftinii wonnde Welingara alaa kalluuji berkaaɗi, so wonaa laawol nasonaal ngol, e kalluyon palikon. O wiy woni miijo makko ko waɗtude Welngara saare moderna, tawa ene heɓa ndiyam, laaɓal, e yah ngarta. E biyɗe makko, so ɓe laamiima ɓe mbaɗataa porogaraamuuji bayɗi no ADME ɗi ngannduɗaa hay nafoore wootere ngaddanaani saareeji men, kono maɓe ngaddu porogaraamuuji paayodinɗi tawa ko modernisooji saareeji men. “Min njiɗi dañde ko saareeji kakkolinɗi (des villes intelligentes) hono no Indo, Ruwanndaa e Afrik di Siid en mbaɗi ni. Tawa yimɓe ɓee maa nattu hatojinde he yahde Ndakaaru ngam safroyaade, janngoyde walla ko nanndi heen.”
Eɗen ciftina PUR (Parti de L’unité et du Ressemblement) woni hooreejo mum ko Ceerno Muhammadu Mustafaa Sih, Al-Makhtuum.
