Lannda L’alliance pour la Justice et la Démocratie/Mouvement pour la Rénovation (AJD/MR jooɗiima he batu patamlamu ñalnde Hoore-biir 20 lewru Siilo 2024 to ñiiɓirde lannda ka he nder Nuwaasoot.
Ndeen joɗnde waɗaa ko he tawtoreede terɗe yiilirde dawrugol (bureau Politique), e suɓaaɓe (les elus) lannda ka, yantude e hooreeɓe cate makka.
Fayndaare dowrowre ndeen joɗnde patamlamre ko suɓaade lomto Ibraahiima Moktaar Saar, kadi toɗɗaade mo lannda kaa suɓotoo ngam yoo won kanndidaa mum he suɓngoonji hooraagu leydi Muritani 2024. Ndeen joɗnde waɗiraa ko siynude wasiyaaji ɗi batu dowrowu (congrés) lannda kaa he 2023.
Nde joɗnde ndee jooɗii ɓe cuɓiima Mammadu Bokar Bah ngonnooɗo cukko hooreejo AJD/MR ko aldaa e luural nde tawnoo ko kanko gooto wonnoo kanndidaa ngam lomtaade Ibraahiima Saar. Caggal nde ɓe cuɓiimo ɓe mbaɗimo gardiiɗo lannda AJD/MR ɓe kawrii kadi e toɗɗaademo yo o won kanndidaa lannda ka he suɓngooji hooraagu leydi Muritani he 2024.
Mammadu Bokaar Bah, jahroowo he duuɓi 70, ko dawriyanke teskinɗo kadi ɓooyɗo daraade he nder sippirooji dawrugol Muritani, teeŋti he lanndaaji kaɓanteeɗi jojjannde ɓaleeɓe he nder Muritani. Ko o gooto e koy-hoyi mooɓal FLAM o jeyanoo haa e 2005 caggal mooɓondiral Flam jooɗinoongal ñalnde 26-29 Bowte 2005 to wuro Cincinnati, OH Dowlaaji Dentuɗi. Ko he luure jannooɗe hakkunde terɗe Flam he ngaan saanga o yalti mooɓal FLAM o yahdi e huunde terɗe lannda ka, ɓe cosi lannda keso ɓe inniri ɗum Flam Rénovation ko kanum wontoyta Mouvement pour la Rénovation.
Ko he suɓngooji 2007 Mouvement pour la Rénovation, yantondiri e AJD ngam wallude kanndidaa Ibraahiima Saar he ɗiin suɓngooji.
