Caggal ñalawma keewɗo wuuku-waaka, dukooji e duudondiral hakkunde sarɗiyankooɓe lunndo ngoo YAW e TAXAW e sarɗiyankooɓe mooɓal laamingal ngal Benno Bokk Yakaar, yantude e sarɗiyankooɓe lannda PDS mo Karim Wadda, sarɗiyankooɓe ɓee kawrii he duñde lajal suɓngooji hooreejo leydi Senegaal ha 15 Bowte 2024. Sarɗiyankooɓe ɓee toɗɗiima tawi 105 ene njahdi heen, tawi ko sarɗiyanke gooto mo jeyaaka hay he mooɓal gootal, Ndey Faatu Gise kanum woni mo yahdaani heen. Kono ɗeen toɗɗe mbaɗi ko caggal nde sanndarmaaɓe njaltina sarɗiyankooɓe lunndo ngoo, yimɓe YAW e TAXAW yanti e Ceerno Alasan Sall e Pappa Jibriil Faal he dow yamiroore Hooreejo Suudu Batirdu Ngenndi o, Aamadu Maam Joop.
Ngaal kuulal kadi laawɗinii keddagol Makki Sal he hoore leydi ndii haa nde lomto makko suɓaa fof.
Baylagol lajal suɓngooji ɗi addi dillere mawnde he nder Ndakaaru, saare laamornde nde. Kadi yimɓe heewɓe kollirii wonnde mbeltaaki he ngaal gollal, sabu e biyɗe mum en, ɗum ɗeɓi nanndude ko he kuddata. Seppooji jahduɗi e bonnere, duppude ponooje e helde werlaaji fof teskaama he nder saare Ndakaaru.
