Caggal nde hooreejo leydi Senegaal, Makki Sal, siifi dekkere mo ene faɓɓitina baɗgol suɓngooji hooraagu leydi Senegaal, kebornooɗi wonde ñalnde 25 Colte wonaandu ndu, miñi makko Aliw Sal, nanaama ene hollira heen yiyannde mum, tawi kadi wiyde “ndeen feere hawranaani ɗum.” Hono no keeweendi he leñaadu Senegaalnaaɓe, Aliw Sal hollirii wonnde ɓuranaani ɗum ɗoosɗe leydi ndii wayleede tawa wonaa ko jari. Sikke alaa, ɗuum ɗeɓiino bettude yimɓe heewɓe, naneede miñi mum mawɗo leydi o, ene jogoo yiyannde feloore pellital mawni mum o, kadi tawa wonaa ko suuɗii. Teeŋti noon nde yimɓe ɓee nganndi kadi ɓaɗondiral hakkunde miñiraaɗo o e mawni mum, kono kadi ɗowtaare e hurum mo Aliw Sal jogii he Makki, gaagaa tan wonde ɗum mawni makko, kono kadi sabu mum wonde gardiiɗo makko to bannge dawrugol.
Ko ndeen yiyannde kadi Aliw Sal tabitini caggal nde suudu diisnordu doosɗe ndu firti oon dekkere e kala kuule ɗe suudu sarɗiyankooɓe nduu lelnunoo ngam dirtinde lajal suɓngooji ɗi. “Alhamdulillah, (jettooɗe ngoodanii Allah), diisnordu doosɗe ƴetti pellital ɓurngal moƴƴude he Senegaal. Ndenndaangal republikyankooɓe, woni nanoyankooɓe ɓee, woni ñaamoyankooɓe, ene poti tellaade he dingiral suɓngooji tuugde he janngo, mbaɗana kanndidaa menn Aamadu Bah kampaañ. Ko ɗuum tan woni laawol baawngol daɗndu ndonateeri hooreejo Makki Sal, mahaa ɗi he dow cuusal e jaambaraagal.”
Sikke alaa, Aliw Sal ene jeyaa e yiɗɓe Makki, goongɗinɓe wonnde mawɗo leydi oo gasnii hankadi, kadi ene foti waɗde feere yaltira no ɓuri yooɗirde. He jaabowol makko laaɓndal Hammee Lih he nder yeewtere mum Ngalu ñalnde Hoorebiir 30 Bowte, 2023, Aliw Sal wiy nde Hooreejo leydi Senegaal, wiy ƴamtaani daawal tataɓal, o diw haa dow o wiy “Alhamdulillah”. He ngol laawol ne kadi nde suudu diisnorndu doosɗe firti dekkere Makki Sal, o wiy ko Alhamdulillah.
