Caggal lawbi keewɗi itta-watta, seppooji, ñaawooji e diisnondire maa taaw Laamtooro jaɓrii Allah hankadi, rewnude junngo mum e daccitde tal-talol ngol boyla suɓngooji ngam falde hooreejo Senegaal jogorɗo lomtaade-mo he ngardiigu leydi ndi. Ko hanki, Njeslaare 6/02/24, he joɗnde batu jaagorɗe ngaadoraagu, o fusi guwarnamaa Aamadu Bah o lomtini ɗoon Sidiki Kabaa, ngam mbele kandidaa Benno Bokk Yakaar o ene waawa wellitaade daña no waɗiroyi kampaañ mum.
Caggal nde hooreejo leydi jaltoowo o, nanngi ñalngu suɓngooji ɗii, wonnde maa waɗ ñalnde 24 Mbooy, o siifi dekkere kadi lajnoowo daawal kampaañ ngal. Ngam siynude pellital diisnorndu doosɗe ndu, teeŋti he kuulal mum tonngoode 5/E/2024, maa kampaañ o fuɗɗo ñalnde Hoore-biir 9 Mbooy, he waktu Ndinga (12:00 jamma) gasa ñalnde Mawnde, 22 Mbooy he waktu 12:00 jamma.
Ɗuum firi, kanndidaaji ɗii ndañata tan ko balɗe sappo e tati ngam waɗde kampaañ he mbeñdi no kuule ɗee njamirirnoo ni, ɗuum woni balɗe 24. Kono hay ɗuum de maa taw won duwatooɓe hoto Makki waylu feere tan ɗoo e ndeen.
