Ko hannde ñalnde Njeslaare 29/05/24/ wullaango maayde Mansuur Sek sarii he nder njaayndeeji e nder laylayti-renndo. Mansuur ko gawlo, farbaggel donɗo yelaa, kono Mansuur ɓuri lollirde ko sabu mum wonde jahdiiɗo Baaba baydi Maal, mo o fuɗɗodii naalankaagal gila ko ɓe sukaaɓe e ɓe njannga liisee, kadi meeɗaani seertude haa ko Allah aranimo ko.
Mansuur Jibinaa ko he hitaande 1955 to wuro Podoor, ko caggal nde ɓe ngari Ndakaaru hedde 1977 kanko e Baaba Maal ɓe naati he turup Lasli Fuuta, caggal mum ɓe cosi Ƴellitaare Fuuta tawi he ngaan saanga ɓe njimatnoo tan ko jimɗi ganni yahdinde e gitaar. Hayso Mansuur ko gawlo njanngunooɗo hoddu ganni ne, ko hoɗde gitaar o ɓuri dartoraade, waɗde ko kanko wonnoo koɗoowo turup o, kono kadi ko o jimoowo jom daande welnde.
Caggal nde Baaba Maal yahi Jaaɓihaaɗtirde ngam janngoyde gaaci, he 1982 o heɓi bursi ngam jokkoyde jaŋde makko to Farayse he duɗal biyeteengal École des Beaux-Arts duɗal mawngal keblowal he kala yowitii he ŋeeñal toon to Paris lesdi Farayse. He 1984 o waɗi feere haa Mansuur ari Farayse tawimo toon. Ko ndeen ɓe cosi Daande Leñol. He ngaan saanga Mansuur wonno koɗoowo gitaar orkest o, ko he ɗiin jamanuuji album maɓɓe “Jam leeli” (1984) yalti.
So Baaba Maal lollirii he nder aduna hee kala “Roi de Yela” ko Mansuur jey sabaabu, sabu yelaa ko jimɗi awluɓe, jimɗi ganni ɗi hay gooto suusaano yimde wontano ɗum jam so wonaa tawa oon tigi ko gawlo, kono Baaba Maal yimi yelaa awluɓe ngoppanirimo ɗum sabaabu nde sehil makko, jahdiiɗo makko Mansuurr Diine Gawlo Sek. Ndeke so en mbelaama mbiyen ko Allah waɗi Baaba, kono Mansuur waɗi Baaba.
Hayso tawii Mansuur jeyanoo ko he orkester Daande Leñol ne, caggal nde Baaba Maal ɓuri abbitoraade he fiyde gaaci tuubakiri (music modern) Mansuur kanum ene jokki sahaa kala yatinde albomaaji tawi ko he gaaci ganni (music traditionnelle) walla mbiyen acustic. Ene jeyaa e ɗiin albomaaji: “Yelaayo”, “Nder Fuuta 1”, e “Nder Fuuta 2”.
O ubbaama hanki, toon to genaale juulɓe to Yoof.
Yoo toon won fooftorde makko. Yoo Geno Moƴƴu e makko, suddamo he yurmeende mum.
