Ko ñalnde Njeslaare 12 Korse he nder batu jaagorɓe Biram Suley Joop jaagorɗo kalfinaaɗo caasam e oogirɗe fawi he dow junngo hooreejo leydi Senegaal, Basiiru Jakhaar Jomay Fay, wadere Petrol addiinde safeede he ɓunndu Sanngomaar. Hooreejo leydi o hollii weltaare mum, kadi duwaniima Senegaal nde oo-ɗoo petrol ardata ɗum jam; adda ngalu barkinngu tawa ene wonndi e deeƴre nanondiral.
Eɗen ciftina tan ko ñalnde Mawbaare (Talaata), kompañi Ostaraalinaaɓe (Australie) Woodsise Energy, kalfinaaɗo golle ɗee o habrii wonnde ɓe puɗɗiima safde baragal maɓɓe petrol garwaniiwal to ɓunndu Sanngomaar.
Goomu ngenndiiwu ngam laɓɓinde kala ko fayti ngaluuji gaasteteeɗi (Le Comité national de l’Initiative pour la transparence dans les industries extractives-Cn-Itie), ene hollita weltaare mum, kon kadi eɓe mbasiyoo laamu nguu nde rewindtoo peccugol ɗiin ngaluuji jaltooji e gaastogol Petrol o e gaas o, kono e no ɗum reenirtee tawa ko he peewal.
Haa jooni, nguun goomu ngu ardii ɗum Hulimata Saar, ene eeroo laamu Senegaal nde yaltinta sahaa kala humpitoojo katojinaaɗi ngam rewindaade holno ɗiin ngaluuji petrol e gaas kuwtortee he nder bidse leydi ndi.
Fedde ndee ene eerii nde ngaluuji ɗii njogortee he nuunɗal, tawa kadi ene waawa horeede e laɓɓineede.
