Marodi, galle jaltinoowo magooji-doge ñaawaama he dow mum yoo yoɓ 21 miliyonŋ. Liɓi ndeen ñaawoore ko tirbinaal njulaagu mo ndakaaru. Ndeen ñaawoore waɗi ko caggal nde winndiyanke magooji, Kadijatu Sih, nootirtooɗo “Kalista” noddi Marodi he ñaawoore. Kalista (Khadidiatou Sy) ko winndiyanke keɓtinaaɗo sabu makko winndude mago-doge lollungo “Maitresse d’un home marié”. Kono caggal ɗuum o acci gollondirde e Marodi TV.
Hooreejo Marodi o, Masammba Nduur, ene adda jaabowol mum he kaan ɗoon haala he nder jaaynde L’observateur ñalnde Alkamiisa. E biiɗe Masammba Nduur, luurondiral hakkunde Marodi e Kalista Sy wonnoo tan Miliyoŋaaji 5. Oon kaalis woni mo winndiyanke o fotnoo yoɓeede caggal so o gayni winndude doge 32 jolal tataɓal kadi cakkitiingal he ngoon mago. O winndi doge 32 ɗee haa gasi tawi omo naatni heen magiyanke teeŋtuɗo o (personnage Principal) Marem Dial, kono sabu waasde nanondiral hakkunde Marodi e Halima Gadji, potnooɗo aywinaade Marem Dial he nder mago hee o, ɓe pelliti winnditaade doge ɗee kala tawa suka “maitresse” Seek jaañ o alaa heen. Nde jolal (saison) ngal fuɗɗii ndee ene heewnoo caɗeele e keñe kono feera alaano, ko maa ɗum waɗee tan. Kanko suka dewbo o (Kalista) o himmirani golle ɗee haa o winndi doge heen doge sappo kono felliti dartinde gollondiral makko e Marodi.
Masammba Nduur wiyi ɓe pelliti wonnde MARODI koko jokkata mago ngoo hayso jeynooɗo miijo ngo o, woni Kalista tawaaka. “ Min njeewtidi heen hay mettere wootere alaano hakkunde amen. Mi famminiino-mo wonnde min ƴettii pellital yettinde mago ngoo hono magooji amen keddiiɗi ɗii ni kala. Ko noon min mbaɗi, min njokki winnditaade doge ɗee haa 32 ɗee timmi.”
Galle juɓɓinoowo (maison de production) o e winndiyanke o ene keewnoo jooɗtaade caggal lebbi tati fof, ngam ƴeewtaade ngartam mum en no foti ɓe pecca. Ko noon ɓe ngoowno waɗɗe gila he jolal go’o. Nde ɓe cakkitii jooɗaade he 2022, Kalista laaɓndii miliyoŋaaji 21 fcfa: “ Mbiy moomi mi tottataamo miliyoŋaaji 5, ɗi o fotnoo heɓde so timminii doge keddiiɗe ɗee. Sabu o yettinaani golle ɗe. Ko ɗuum addunoo luurondiral hakkunde amen.”
