Alice Diop naɓakayanke Faraysenaajoo-Senegaalnaajo, heɓii njeenaari Cesar Filma gadano ɓurɗo kelɗude.

Alice Diop naɓakatiijo Faransiijo-Senegaalnaajo heɓii njeenaari Cesar Filma gadano ɓurɗo kelɗude (César du meilleur premier film), sabu Filma makko “Saint Omer”.

Saint Omer ko filma ñaawoore (legal drama) jaltuɗo he 2022 tawi ɗowi ɗum ko Alis Joop (Alice Diop) wonno magiyankooɓe dowrowɓe ɓee ko Kayije Kagame e Guslagie Malanda. Ko kanko woni filma Alis gadano tawa ko juutɗo (long-métrage), ko adii ɗuum omo waɗatno filmaaji dokimanteer.

He nder Filma he, Rama (Kagame) ko suka dewbo wallifinyanke pentol, kadi dewbo-reedujo ene yahatnoo hawritoyde he ñaawoore Laurence Coly (Malanda), suka dewbo Senegaalnaajo takkaɗo wonnde warii ɓiyngel mum jahratnoongel he lewbi 15, o woppi ngel he daande geej bempeƴƴe ngari ndoondi ngel njooloyi ngel. Fayndaare Rama he tawtoroyeede ñaawoore ndee ko yiɗnoode eggude joljole ɗee waɗta ɗum pentol he mbaydi Medea.

Filma o tuugnii ko he joljole goodɗe, fawaade he ñaawoore Fabienne Kabou to Farayse, he 2016.

He hitaande 2013 laamu Farayse takkii Fabiyeen Kabu wonnde warii biyngel mum dewel, hono no filma o annimirta Rama ni. He tuma nde ɗum waɗi ndee e jaati Joop rewindinooma ndeen ñaawoore waɗnoode to wuro Saint-Omer he nder diiwal Pas-de-Calais rewo Farayse, caggal nde o faami wonnde Fabiyeen ko iwdi Senegaalnaajo hono no makko ni, kadi he ngaan saanga tawi kanko Alis ko o dewbo-reeduujo (deboreedu). Alis wiy o teskiima kadi nde ñaawooree ndee waɗata ndee ko ɓuri heewde e aratnooɓe tawtoreede ñaawoore ndee ɓee ko rewɓe. “Miin ɗaɓɓatnoo-mi ko dañde jaabowol fayde he laaɓndal am nderiwal ngal mi seeraano he laaɓndaade hoore am, woni hol jotondiral gonngal hakkunde ɓiyɗo dewbo e neene mum? Sabu am wonde ɓiyɗo kadi dewbo jibinɗo”, Alis jaŋtii. “Caggal nde njiymi ndee ɗoo ñaawoore ene woƴi rewɓe heewɓe, jaggumi ene jogii huunde huuɓtodinnde wonnde he ngal ɗo joljolal kadi tawat ko wonde jibnaaɗo.

Hayso mbiiɗen no filma oo lelorii ni, ƴettiti tan koko waɗnoo koo he jaati ne, Alis wiy nde o yahata tawtoroyeede ñaawoore nde wona fiɓnoode waɗtude ɗum filma nawimoomo, kono ko yiɗnoode tawtoreede ñaawoore nde tan, maa taw ko sabu omo so’a banndiraagal hakkunde makko e Fabiyeen Kabu, kadi waɗtude joljolal ngal filma aranimo koko juuti caggal nde ñaawoore ndee gasi. Nde tawnoo ko fimlaaji dokimanteer tan o waɗatno, Alis Joop waɗi filma mum juutɗo gadono, sabu tirbinaal oo jaɓataano kameraaji naatne nder to. “Addanimi waɗde oo ɗoo filma ko sabu yiɗde mahtaade teskuya am heɗaade daartol dewbo goɗɗo tuma nde ngonnoomi e laaɓndaade hoore am, kadi tawi miɗo wonndi he caɗeele hoore am.”

Filma oo holliraama he kawndire (kawgel) keewɗe, kadi o heɓii njeenaaje walla o jeeyaa e cuɓaaɗi dowrowi, He 7 Silto (Septembre) 2022 o holliraama to kawgel 79^ɓle Venice International Film Festival, o heɓi toon njeenaari Mbaroodi Kaalis e Luigi De Laurantiis Lion of the Future Award. Caggal ɗuum kadi o holliraama to Festival International de Film de Toronto 2022, e 2022 New York Film Festival, ko addi nde o yaltintee e sinemaaji.