Caggal joɗnde juutnde sabu gaañannde he koyngal, fuguyanke Senegaalnaajo oo fettidii e kippu mum bayern Muinch kikiiɗe hannde Dewo-Hoorebiir. Fuguyanke internasonal Senegaalnaajo o lomtiima Kingsley Koman caggal nde fijo ngoo yehi haa hojomaaji 64, caggal nde kippu ardii (3-0).
Caggal nde o dacci tawtoreede kup adunaaru he nder kippu Senegaal ɓe o wonnoo yaakaare mum en ɓurnde toowde, e kawrital maɓɓe gadanal e PSG he ligue des champion (1-0), Fettiyanke liverpool ndeen o, hollirii wonnde heɓtii coftal mum kadi omo ɗaminaa maa o tawtore fijo duttal ngal, jogorngo waɗde ɗo e balɗe sappo. Ɗuum maa won ballal mawngal wonande JulianNagelsmann sabu eɗen nganndi Bayern ene jogii caɗeele noo feewi to bannge conngugol (offensive) gila ko ene wona jooni lewbi nay.
Eɗen ciftina tan Saajo Maane fettii, gila jolal ngal fuɗɗi, 23 fijo tawa ko he pooɗondire ɗee kala, kono naatni tan ko loggi 11 kadi heɓnii laabi 4 juumtuɗi. Ɗuum ene ɗeɓi jaasnoode njoorto makko, mo ngannduɗaa ko yiɗnoode heɓtude coftal makko e mbaawka makko gaddannongal mo wonde ɗiɗaɓo he kawgel “ Balon Kaŋŋe”. Ko waawi heen wonde fof eɗen mbiya tan yiɗɓe ɓinngel Bammbali ɗo he nder Aduna oo kala e mbeltii, e yiydemo he dingiral fugu.
