Bamako habrii ñalnde Njeslaare (Alarba) yiɗde mum ittude he juuɗe Farayse gongol mum jogo-karambol (porte-plume) he kala ko fayti he kuule toɗɗiiɗe Mali he nder Goomu ndeenka e kisal (Conseil de securité) mo Njuɓɓudi kawtal leyɗeele. He ɓataake binndaaɗo ñalnde Njeslaare 1 Mbooy, 2023, fayde e Pedro Comissario Alfonso, hooreejo tumaajo Goomu ndeenka e kisal kadi ammbasador leydi Mosambik to (NjKL), laamu Mali feeñini heen yiɗde mum soltude he junngo Farayse wonde ɗum jogo-karambol Mali.
“Farayse ko kanum tan wonno jogo-karambol he kala ko toɗɗii Mali he ngal ɗoo tergal (GndK) paayodinngal, hay miijo eɓɓaande kuulal jowitiingal mandaa mo MINUSMA.” He nder ɓataake o, jaagorɗo Malinaajo kalfinaaɗo jokkondire e caggal leydi, Abdullaye Joop, siftinii tuumaaji ɗi Mali jogii fayde he leydi Farayse, ɗuum woni wonnde koyɗe Farayse ko sarde Mali e ittude toon deeƴre.
Gollal “jogo-karambol” joofi ko tergal Goomu ndeenka e kisal, gardotooɗo termondiral e binndugol kuulal (résolutions) jeyangal he toɓɓe batu goomu ngu. Gila 2012, nde Mali woni e boneeji jihaadiyankooɓe e Tuwaareg en fooɗantonooɓe jeytaare mum en, ko farayse halfintee ɗuum kala nde geɗe Mali poti yeewteede he batu goomu ngu.
He lewru Juko yawtundu nduu, laamu Mali hakkundeewu, portiino Farayse pelente to Goomu ndeenka e kisal mo Njuɓɓudi Kawtal Leyɗeele, sabu wiyde Farayse ene tooña ɗum, ene yaɓɓa hurum mum, kadi ene itta deeƴre he leydi mum. O hollirii kadi laaɗe diwooje konu Farayse ene ndiwa he dow weeyo Mali tawi aldaa e yamiroore walla sakkitoore laamu Mali. Ɗee geɗe fof so rentii, Abdullaay Joop wiy: “Maa oon tigi laaɓndo hol ko woni fayndaare Farayse walla nii mbele ene waawi jogaade nuunɗal e ko halfinaa ko?”
