Hono no diiwe Senegaal ɗee ni kala, diiwal Maatam mawninii ñalnde 4 Seeɗto, maanditaare 63ɓre jeytaare Senegaal ndimaagu mum dawrugol. Hakke ujunere Siwil, militeer e paramiliteer (police, Douane, ekn.) njeyaama e maajatnooɓe he nguun njeeɓeegu, so en tuugniima he APS nokkuɓe ɗum he cukko-gardiiɗo diiwal Maatam Moodu Caam. Heen 680 ko elewaaɓe ummiiɓe he duɗe lesleseeje diiwal ngal. Pelle goɗɗe, ko wayno Croix-Rougr, ekloor en (les éclaireurs) pelle sagataaɓe e soldateeɓe yarlitaare (agents de sécurité de proximité), heen fedde fof addii terɗe 25 woni yimɓe 100 ngam waawde jeyeede he ñaaƴo ngo.
Kooniŋkooɓe ɓee e dadiiɓe woɗɓe ɓee kanum en ne ngaddii 345, ko jidaa e werlaaji sendarmori e otooji militeeruji.
Mawɗo diiwal o, Muhammadu Mukhtaar Wat, hollirii weltaare mum he no ñaaƴo ngoo yahri ni, kadi o wiy tem ƴettaaɗo hikka o “Semmbeeji ndeenka men e reende ngaluuji men sewloyankeeji”, ko huunde fotnde teskeede. Sabu ndeenka ngaluuji men sewloyankeeje ene waɗi caɗeele sanne. Sabu ɗiin ngaluuji ko wayno leɗɗe men nana coppee tawa ko he mbaydi ndi rewaani laawol, rewrude he duppude ɗum ene waɗta ɗum en ƴulɓe, walla leɗɗe defirɗe. E biyɗe mawɗo diiwal o, caɗeele dookɗe ladde men ndee ene keewi. Ene heen ko waynoo cumuuji ladde keewɗi waɗde he nder diiwal Maatam ngal. Tawa so ɗiin cumuuji ɓadiima gure ɗee ko dadiiɓe halfinaaɓe ndiyam e dune (eaux et forêt) e Sappoor Pompiyee en ndarotoo ngam faddaade ɗum. Ɗuum firti tan, e wiyde Muhammad Mukhtaar Wat, ko tem ƴettaaɗo hikka oo, semmbeeji ndeenka e kisal gonɗi he diiwal ngal nana ngolloroo ɗum no feewi.
