Laamu kooninkooɓe Mali yaltinii hanki, Njeslaare 10 Seeɗto 2024, dekkere jamirɗo pusgol kala lanndaaji e pelle dawrugol walla mbiyen dartin’gol golleeji majje he nder leydi ndi. E wiyde kalfinaaɗo konngol laamu ngu o, Kolonel Abdullaay Mayga, ngaal pellital ƴettiraa ko ngam reende kisal e deeƴre leydi ndi.
Ngaal pellital ƴettaa ko caggal nde lanndaaji dawrugol ɗi e yoga e pelle renndoyankeeje puɗɗi eeraade laamu ngu wonnde yoo huccan heblanaade suɓngooji e waɗtude laamu nguu he juuɗe siwil en caggal nde happu mo laamu fadeewu nguu yowondiranoo o yawti.
Hayso tawii kanko kalfinaaɗo konngol guwarnamaa o, o rokkaani hay firnde wootere hollitoore wonnde pelle ɗee e lanndaaji ɗii ene ngolloo ko ene haɗa deeƴre e kisal e nder leydi ndii, o biskitii pelle ɗee kam e wiyde ɗe ndaraanii tan ko haalaaji puyɗi ɗi ngalanaa leydi ndii nafoore, kadi ene mbaawi umminde fitinaaji he nder leydi he. O maandinaani kadi holnde ndeen haɗde jogori gasde walla hol ko wonata sabaabu gartirgol ndimaagu e wellitaare pelle e lanndaaji dawrugol leydi ɗee waawde heɓtude jojjannde mum woodde e waɗde ko woni golle mum en ko.
Ismayla Sakko, gardiiɗo lannda PSDA ene hollita he haalirde RFI wonnde ko laamuu nguu waɗi koo ɗowtaaki kuule e doosɗe leydi ndi, kadi alaa fof mo ɓe ndisnondiri he feere nde ɓe ƴetti nde. Omo eero kala daraniiɓe tabitingol demokaraasi he nder leydi ndi, nde ummotoo mbele eɓe ndartina nguu laamu njaggu, ngu ɓee kooninkooɓe njiɗi laamoraade Mali.
