Mali: Joljole keewɗe ɓaɗooje to leydi too, gila he haala haa e golle ene faayni heewɓe yalli, wolde hakkunde laamu leydi ndii e serindiiɓe Tuwaareg en, jogoraani kadi fuɗɗitaade.
He yontere yawtunde ndee, pelle konuyankeeje jeyaanooɓe e siifondirɓe he laamu nguu nonondiral to Aljeri, kabrii wonnde ene keblii e ƴettude njogitaaje ngam danndaade so tawii laamu kooninkooɓe jooɗiiɓe Bamako ɓee mbiy ene njana he mum en. Ɗuum addanii heewɓe jeertaade mbele wonaa ko he wolde huccaa?
Yuɓɓo renndingo ɗeen pelle serindiiɓe (Le cadre stratégique permanent-CSP) yamirii he tintinoore wonnde yoo yimɓe siwil en ɓee ngoɗɗito nokkuuji ɗo harbiyankooɓe ɓee tuddini, e ɗo kooninkooɓe ɓee tawetee he mum ɗi. Guwenoor diiwal Gaawoo, ɗo porli keewɗi, e pellondiral waɗi he fonte jawtuɗe ɗee o, yamiiri deeƴtugol he nder galleeji (couvre-feu nocturne) jamma haa ñalnde 9 Yarkomaa (Octobre). Ko werlaaji halfinaaɓe ndeenka e kisal tan mbaawi yahde so oon waktu yontii.
Ɗii boneeji noon ngari ko he tuma mo fitinaaji ene ɓeyɗoo ummaade he nder ngaal diiwal Mali, ɗo pelle keewɗe jooma en njogitaaje, ko wayno konu leydi ndii, serindiiɓe Tuwaareg en, e pelle jihaadiyankooɓe pooɗondirta ngam jiimde he nguun noku, Ɗii fitinaaji ene addani yimɓe ɓee hulde wonnde ko he wolde hakkunde ɗeen pelle, ɗe ko ɓuri heewde e mum en ko Tuwaareg en, konu leydi Mali ɗum jogori wattinde. Hono no ɗeen pelle kaɓirnoo e laamu Mali nguu tuggude 2012 haa 2014, caggal ɗuum ɓe ciifondiri nanondiral to Aljeri he 2015.
Coordination des mouvements de l’Azwad, ɓe ngannduɗaa ko tergal he CSP, kabrii wonnde liɓii ndiwoowa konu Mali ñalnde 9 Silto, caggal nde ɓeen mberlii pettooje (bommbooje) he dow tuddunde maɓɓe. Kono gardiiɗo konuuji-weeyo (armee de l’air) Mali, seneraal Alu B. Jara, deeƴnii hakkillaaji yimɓe ɓee he nder haalannde nde o waɗi he ayaawo habrirde ngenndiire nde, wonnde laana ndiwoowa kaa, ko ndañnooka caɗeele karalleeje ko ɗuum addani diwnooɓe ɓee yaltude he makka ngoppika ka yani, kadi ɓeen diwnooɓe, laamu ngu faaboyiima ɗum en tawi hay huunde heɓaani ɗum en.
Njanguuji ɗiɗi, ɗi ene tuumaa he mum en pelle jihaadiyankooɓe ɗe, njooɓiima hakke 64 fittaandu, siwil en e koonunkooɓe hakkunde Tummbuktu e Gaawoo ñalnde Naasaande (Alkamiisa) so en tuugnima he limannde nde laamu nguu tottiri nde. Kono won hollirɓe wonnde ko maayi heen e yimɓe yawtiiɗoon ɗo woɗɗi. Ɗiiɗoo boneeji fof noon ene hawriti he tuma mo MINUSMA woni he tirde kaake mum ngam yaltude Mali, caggal ndee laamu kooninkooɓe nguu duñi boowaal soldateeɓe ONU wonnooɓe he nder leydi hee gila 2013 ngam wallude artirde jam to rewo leydi to.
