He nder nduu ɗoo dunndu yaajndu, sukkundu, ƴamooɓe lefol ngardiigu Senegaal, so oon tegi ɓuraani wond lekki toowki yaññiniiki majjitta ko he nder coɓoƴƴi. Ngam oon tigi waawa tineede e anndeede joom mum ene hatojini e yiyeede, foti ko hono no woon e ɓeen ƴamooɓe lefol ngatdiingu ngol ngoni waɗde ni. Ɗuum woni umminde sateeji mawɗi waɗa njilluji he nder wertaango leydi hee fof, diwal, falnde, gural yoo gurel, joom mum yettoo, yiyndira e yimɓe mum en, haalana ɗum en fayndaare joogi he yiɗde ardaade leydi ni, e so ardiima hol ko waawi waɗde ha safrana ɗum en ngoƴaaji mum en. So ɗuum alaa ko hebbinde jokkondiral mum e jaayndiyankooɓe. Me Aamadu Aali Kan, ko ɗiɗamal ngal suɓii waɗde he darorɗe biir he. Caggal nde o yillii he yeewtere Hamme Aamadu “Ngalu” 2STV ñalnde Hoorebiir, ko Rajo Sud Fm, he yeewtere mumObjection yontanoo hanki Dewo 26 Jolal 2023.
He nder ɗiin njaayndeeji fof, fayndaare ndee ko wootere. Haaldude e ɓiyɓe Senegaalnaaɓe e hollude ɗum en hol ko kanndidaa Me Aamadu Ali Kan ne yooɓorii he ngal pooɗorial haa ene addana ɗum ɗaminaade ɗaftude. “ Fayndaare amen ko daranaade ɓamtaare ɓooyoore, e haɓanaade kiwal taarndi ɓooyoori. Sabu ko ɗum jojjannde leñaaɗi (yimɓe) wuurɓe jooni ɓee, e yontaaji payɗi arde ɗi, yiɗɓe wuurde he taariindi sellundi.
Kanndidaa lannda taariindi mo innde mum woni, Ndaarannde Seertunde ngam Ɓamtaare Ɓooyoore (Regard Différent pour un Développement Durable-R3D) hollirii ummini ɗum ko daranaade ɓamtaare ɓooyoore, ɗuum wonii ko duumi, kono kadi he nder denndaangal jaayndeeji ɗi o yettinoo o memii kadi ngonka renndoyankeewa e dawurugol kanum e faggudu ka leydi Senegaal wuurata hannde ka.
So neɗɗo wiy ene safra caɗeele e ngoƴaaji yimɓe, alaa e sago oon tigi fuɗɗoroo he ɓetooji baɗaaɗi hono no doktoor waɗata ni, Waɗi noon ko leydi men Senegaal wonaa ngalɗundi. Eɗen nguuri hannde he fitinaaji keewɗi to bannge dawrugol, renndo e faggudu, kono kadi fitinaaji to jeyiiji leyɗeele. Eɗen nguuri gila he 2021, fitinaaji hakkunde ceŋɗe ɗiɗi baabondirooje, woni seŋngo lBenno Bokk Yakaar, he gardagol mawɗo leydi o, e seŋngo lunndo ngoo, Yewwi Askan wi, he gardagol Usmaan Sonko. Ko ɗum duudondarial ngal suuɗaaki.
E yiyannde hujjiyanke o, ko ɗuum addi sabaabuuji caɗeele keewɗe tammpinɗe Senegaal hannde. Sabu ɗuum jibinanii leydi ndii dartogol dillere faggudu ndu, kadi saabiima barmuɓe (gaañiiɓe), maayɓe e ujunnaaji yimɓe haɗaaɓe wellitaare mum en walla tawa nii nana he nder dummbirɗe. Ɗiin fitinaaji leeltinii ɓamtaare faggudu leydi ndii. Sabu FMI hollirii wonnde Senegaal waasii 1.5 he ɓeydaare mum hitaandeyeere, ɗuum noon so hiisama ko miliyaaruuji keewɗi. Ɗuum hollirii wonnde hay leydi ngootiri waawa ɓamtaade so wuri he fitina. He yiyannde Me Aamadu Aali Kan, kala jogorɗo wonde janngo hooreejo leydi Senegaal, ko foti adaade waɗde ko artirde deeƴre he leydi he, ñifa fitinaaji dawrugol ɗi.
Hayso tawii heewɓe hannde he nder Senegaal nganndiri Me Aamadu Aali Kan ko wonde tergal he fedde RADDHO kaɓanteeɗo jojjannde aadee ne, hujjiyanke o ene siftina ɓooyde mum daraade he lanndaaji dawrugol. O wiy o fuɗɗima naatde he lanndaaji dawrugol gila omo jannga to duɗe dowrowe (Lycee Faidherbe de St Louis), ko he 1976 o woni tergal he RND lannda Seek Anta Joop, He 1993 o walliino Iba Deer Caam, tawi saabi ɗuum ko hoɗidiiɓe makko, Tijjaani Lih e jooma suudu mum Maryam Wan Lih. Caggal ɗuum, he 1998 o naati he lannda l’URD mo Jiboo Leyti Kah, ko heen o woni haa 2004 nde jiboo yantoyi e Abdullay Wadda.
He laaɓndal Hamme Lih, mbele o ɓuri naayoraade ko bannge laamu nguu walla bannge lunndo ngo, Me Aamadu Aali wiy tan ko kanum alaa kaɓdiiɗo, he yiyannde makko suɓngo ko gooto fof yoo hollir peeje e miijooji mum ɗi sikki ene mbaawi nawrude leydi ndi yeeso, yimɓe ɓee cuɓoo mo peeje mum ɓuri naatde hakkillaaji mum en. Ɗuum jaraani hare, duudondiral walla kelondiral koye.
