Gila Senegaal heɓi ndimaagu mum dawrugol, ko worɓe tan ngardotoo leydi ndi, kono yontii hankadi ko dewbo ene resndee hoolaare ngardiigu leydi. Ɗuum ko miijo Seekh Jaraaf, koolaaɗo Porofesoor Amsatu Soh Sidibe, gooto e ƴaamooɓe lefol laamu leydi Senegaal. “Min teskiimaa duuɓi cappanɗe hannde, ko worɓe tan ngardii Senegaal. Kono he ngol ɗoo laawol emin mbeeɗi Senegaalnaaɓe junngo, gila wonɓe he nder leydi ndii haa to caggal leydi, nde ɓe ngarata ɓe mballita oo ɗoo mo ngannduɗen kanum wonaa dawriyanke 100% (teemedere he nder teemedere), kono ko neɗɗo jooma ganndal, nuunɗuɗo, renndoyanke sanne, kadi ko o neeneraaɗo. Ko ɗuum jey sabaabu amen jeyeede he fooɗondirteeɓe lefol ngol.” O ƴetti ɗii konnguɗi ko caggal nde o yalti to ñiiɓirde Cdc (Caisse des dépôts et consignations) to o arnoo tottirde njolnudi kanndidaa makko Amsatu Soh Sidibe.
He biyɗe Seekh Jaraaf, eɓe keblanii he addude mbayliigu he leydi he. Ko ardii fof ɓe timminii dafanaare maɓɓe kadi ɓe lelnii njolnudi maɓɓe, ɓe timminii sarɗiiji leydi ndi he ko yowitii e kuule suɓngooji. Seekh Jaraaf, mantii jikkuuji mawɗo lannda CAR LENEEN, mo wiy : “ Hooreejo Amsatu Soh Sidibe ko ganndo, omo jeyaa e rewɓe waɗɓe ko majjataa maaytataa he nder daartol Senegaal. O heblii ko ene ɓura 15000 ɓiyɓe leydi ngenndiyankooɓe. Ko dewbo jooma konngol, jogiiɗo ko salatoo. Ko ɗuum wonnoo jikku makko hay nde o wonndunoo e hooreejo leydi o”.
Koolaaɗo (mandataire) Amsatu Soh Sidibe o ene joortii tan wonnde maa goomu doosɗeyankeewu ngu jaɓ ɓennide ɗaɓɓaande makko jeyeede e ƴamooɓe lefol hooraagu leydi Senegaal, so ɗuum waɗii kadi maa Senegaalnaaɓe ndesndu mo hoolaare ngardiigu leydi ndi.
PorofesoorAmsatu Soh Sidibe, eɗen ciftina ene jeyanoo he fooɗantinooɓe lefol hooraagu leydi Senegaal he suɓngooji 2012, ko caggal nde yahaa daawal ɗiɗamal o yanti he Kawtal Bennoo Bokk Yaakar, ngam wallude Makki Sal. Caggal ɗuum o wonii jaagorɗo diisnondirteeɗo, toppitiiɗo jojjanɗe aade e deeƴre (jam) 2013-2016.
