Mbele Senegaalnaaɓe ngonndi ko yawde e yaawaade leydi mum en, e waasde hurmaade lefol hooraagu leydi ndi kanum e kala ko wiyetee njuɓɓudi leydi? Ko laaɓndal ngal heewɓe puɗɗii werlaade, caggal ko yiyaa toon he ɗiiɗoo duuɓi jawtuɗi, teeŋti gila nde uddital ɗaɓɓude jeyeede e fooɗantooɓe hooraagu leydi ndii fuɗɗii. Keeweendi waɗɓe ɗaɓɓaande walla mbiyen wiyɓe ene njiɗi jeyeede he fooɗondirteeɓe lefol hooraagu leydi, ko ene ɓura yimɓe teemedde ɗiɗo, hollirii yimɓe ɓee pawaani wonde hooreejo leydi ndii ɗo tiiɗi.
Yoga he yimɓe hollirnooɓe yiɗde mum en jeyeede heen haa ngaddoyi ɗereeji parenaas, mbaawaani ɓennude ngaal dawal, ɗuum firti ɓeen mbaawaani dañde hay 44.231 neɗɗo jeyaaɓe he doggol suɓotooɓe paarena ɗum en, haalaaka noon 30 miliyoŋ jukunnde o. He nder 93 deposɓe doggi mum en, ko 21 tan njawti.
Heewɓe heen ko piyanɗe gabbule tan e njiyeekam, naneekam naatnunoo ɗum en heen, nde bawɗi goonga tunngunoo tan njahru caggal. Ceerno Siisee kanum daasii fenaande mum haa suti ɗum fawi he dow juuɗe suudu halfinaandu ndeenka ɗoosɗe (conseile constitutionelle).
Ceerno Siisee, kandidaa bellello (independent) he suɓngooji 2024, jahroowo he duuɓi 53, fanniyanke he karalleeje kese, (informaticien) he no o wiy, nana fawaa hannde juuɗe sabu huwtoraade doggol paarenɓe ngol moƴƴaani he nder ɗereeji (dossier) mum parenaas. Kanko o somaani yiyloyaade yimɓe nii saka o wiyee o timminii walla ala. O waɗi tan ko doggol makko inɗe sappo e tato neɗɗo ɓe o wiy ko dipiteeji, te hay gooto anndaa ɗum en he nder Batirdu Ngenndi Senegaal. Caggal nde ɗereeji makko kiñaa tawaa ko ɗereeji fenaande, ɓe neldi ɗum to suudu losko bonannde (direction d’investigation criminelles-DIC), ɓeen ngari toon ñalnde Naasaande, 4 Siilo, ƴettimo paawi he makko junngo.
He nder losko hee Ceerno Siisee yeddaani bonannde nde waɗi nde. He biyɗe makko o ɓami pellital jeyeede e ƴamooɓe lefol laamu Senegaal ɓee tan ko ñalnde 23 Juko 2023. Ko ndeen o haalani jooma suudu makko e huunde e banndiraaɓe makko. Kadi gila ndeen ni, alaa sabaabuuji o dillini ngam heɓde yimɓe. Ko ñalndee 26 Bowte, o wiy, o yaɓɓi koyɗe makko o yahi haa conseil constitutionelle ko kanko e hoore makko depoosi ɗereeji makko. Ceerno Siisee ene jaɓi wonnde ko takkaa koo ko kanum tigi waɗi ɗum, kadi omo heblii e ɓamde kala ko heɓtiimo heen.
Ko wonaa doggol paarenɓe ngol, polisaaɓe ɓee tawi kadi sek makko 30 miliyoŋ mo o addunoo ngam jukunnde o, tawaama, hay tamma julaaɗo alaa he nder booñ makko mo o udditnoo to banke BIS.
Ko ñalnde Naasaande, 11 Siilo tirbinaal ñaawoowo nanngiraaɓe bonannde (tribunal des flagrant délits) mo Ndakaaru ñaawimo sokngo lewbi jeegom, e fawre 100.000 CFA.
