Golle Siyaara Ceerno Saydu Nuuru e Ceerno Muntagaa Taal, he koolol mum 43ɓol timmi hannde Dewo 28, 01,2024 to Jumaa Sayku Umar Taal, he dow laawol Alhajji Maalik Sih, Ndakaaru. Siyaara o ene waɗee hitaande kala, ngam siftorde ɓeen jiyaaɓe Allah, woni Ceerno Saydu Nuuru Taal e Ceerno Muntagaa Taal, laatinooɓe mawɓe ɓesngu e almuuɗɓe Seyku Umar Taal he nder Senegaal.
Ñalɗi ɗii ene mbaɗa hitaande kala he tawtoreede almudɓe Tijjaaniyankooɓe, ummoriiɓe nder wertaago leydi Senegaal he kala, kam e leyɗeele Afrik, ɗal boom yimɓe ummoriiɓe he jookli adunaaru nduu kala.
Golle ɗee puɗɗaama gila ñalnde Mawnde (Aljumaa) he tawtoreede hooreejo leydi Senegaal Makki Sal, e sateeji ummiiɗi he galleeji diine gonɗi he nder Senegaal ɗii kala, kono kadi sate mawɗe ummoriiɗe leydi Marok. Eɗen nganndi jotondiral mawngal nana hakkunde mawɓe diina’en Senegaalnaaɓe e Marooknaaɓe teeŋti noon e yimɓe jeyaaɓe he laawol Tijjaaniyah.
Caggal juulal Jumaa, gardiiɗo galle Sayku Umar he Ndakaaru o, Ceerno Madaani Taal, bismiima denndaangal sateeji garnooɗi, kadi o jaɓɓiima hooreejo leydi o, Makki Sal, o jaari ɗum kadi he ballal mum ngal addi mahtagol jumaa Seyku Umar mo Ndakaaru, O duwaniima mawɗo leydi o kadi nde timminirta ngardiigu mum he dow jam e deeƴre. Kanko Kaliifa o hollirii wonnde ngardiigu Makki Sal addanii Senegaal fof ɓural e ɓeydaare.
Caggal ɗuum nde hooreejo leydi o ƴetti konngol, o ruttii salminaandu fayde Ceerno Madaani e dental ngal he ɗemngal Pulaar. O hollirii, kanko mawɗo leydi o, wonnde geɗe Sayku Umar al-Fuutiyyu, ko geɗe juulɓe kala, nde tawnoo Seyku Umar haɓanaa ko diine Allah, kono faaro Senegaal ene heen. Nde tawnoo hayso tawii grɗe Sayku kaaɗaani tan he nder Senegaal ne, ko ɗo Halwaar ɗo, he nder leydi Senegaal fof fuɗɗii.
Golle ɗee njokki haa hannde Dewo-hoorebiir, wonndude e dewe Allah, ko wayno jaŋde Qur’aan, wirduuji e duwawuuji, kono kadi jeewte ko toɗɗi nguurndameeje Ceerno Saydu e Ceerno Muntagaa, walla ni Sayku Umar al-Fuutiyyu. Jeewte dingiral kadi mbaɗaama toon tawi yowitii ko he holno jam duumortoo he adunaaru ndu teeŋti he leydi Senegaal, e holno koɗdigal jam-yamal waawirta ñiiɓde hakkunde yimɓe leydi ndii kala.
