He tuma nde o wonnoo heblanaade kampaañ ngam fooɗanaade lefol hooraagu leydi Senegaal, Rose Wardini, Hooreejo mooɓal Senegaal Keso (Senegal Nouveau) fawaama junngo hanki 2/02/24. Ɗuum waɗi ko ñalawma gooto balɗe ɗiɗi tan ko adii nde kampaañ o jogornoo fuɗɗaade,
Caggal nde Ceerno Alasan Sal, gooto e ƴamooɓe lefol hooraagu en ɓe wullitii wonnde ene tuuma he Sonnaajo o, Rose Wardini jogaade ɗereeji jeyeende ɗiɗi, Senegaal e Farayse hono habriri ɗum jaaynde Source A, ko ndeen o noddaa to DIC, halfinaaɓe loskooji bonannde. Caggal nde ɓe keɗiimo, ko ndeen ɓe kabrimo wonnde ene fawi he makko junngo.
Sonna Wardiini heɓiino yawtude daawal parenaas haa diisnordu doosɗe jaɓaniimo jeyeede e noogaas dañɓe sakkitoore jeyeede he ƴamooɓe lefol hooraagu leydi Senegaal.
He kaayitol ummoriingol he lowre Faraysenaare service-public.fr nde tarii ɗum dakaractu, holliri wonnde Rose Wardini ene winnditii ngam jeyeende e wootooɓe to konsilaa Farayse ngonɗo he Ndakaaru, ɗum firti omo jogii ɗerewol jeyeende ko wonaa ngol Senegaal ngol tan, tawii ɗuum ene yaɓɓi kuulal 28 doosɗe leydi ndii biyngal “kala mo ene ƴama lefol hooraagu leydi ndi, ko alaa e sago tawa o jogii ko ɗerewol jeyeende Senegaal tan”.
Soknaajo o, hono no kala kanndidaa ni, woondiino wonnde jogii tan ko ɗerewol jeyeende Senegaal, tuma nde o naatnata ɗaɓɓaande makko.
