Hooreeɓe leydi Senegaal ɗiɗo hiiɗɓe ɓee, Abdu Juuf e Abdullaay Wadda, njantii e yimɓe heewɓe werliiɓe konnguɗi mum en he dillere wonnde Senegaal ndee, tawi saabii ɗum ko dirtingol suɓngooji kebornooɗi waɗde he nduu ɗoo lewru.
Kamɓe hooreeɓe leydi hiiɗɓe ɓee ɓe noddii Senegaalnaaɓe, teeŋti noon e sukaaɓe ɓee nde ndartinta seppooji ɗi, kadi dawriyankooɓe ɓee yoo nootitoo he kaaldigal ngenniyeewal ngal, kono ɓe mbiy ɓe kaaldii kadi e hooreejo leydi o, Makki Sal, nde waɗata feere mbele suɓngooji ene mbaɗa ko ɓuri yaawde e yaaccaade, e nde noddata he yeewtere yaajnaande ngam beldital e kawrital leydi ndi.
“Ko he ɓerɗe kecciɗɗe njurum min nguurata ndee dillere yerɓinnde leydi men Senegaal, nawornde pittaali tati sukaaɓe leydi men. E min nelda jibnaaɓe maɓɓe e koreeji maɓɓe kala duwaaw.” Hoorɓe leydi ɓooymaa ɓee teeŋtini he ɓataake mum en.
“E min kaalda e mon sabu amen wonde, hooreeɓe leydi ndii ɓooymaa, sosɓe wonndude e Seengoor, demokaraasi Senegaal keɓaaɗo he dow sippiro toowngo, kono kadi e wonnoode luurduɓe jiyanɗe he ko ɓenni. Haɗaano noon e min njeewtidatnoo e min kaaldatno min nduuñta luure amen e caɗeele dawrugol ɗee, tawa fayndaare mum wonno tan ko ngam jam ene duumo piɗtaali mbasaa bonde. Onon ne on potaani waɗde ko jaasi ɗuum.”
Kamɓe hooreeɓe leydi Senegaal hiiɗɓe ɓee, ɓe teeŋtinii noddaandu maɓɓe fayde he sukaaɓe ɓe. Ɓe ɓe mbiy e ɓe paamani ɗum en mette mum en e haaɓre mum, nde ndartinta ko yaaccii fitinaaji e bonanndeeji ɗi mbaɗata ɗi, kadi njahra caggal gila semmbeeji iwruɗi caggal leydi, jogiiɓe payndaale niɓɓe, naarde e mum en keeda ɗum en he hakkillaaji mum en.
Hooreeɓe ɗiɗo ɓe kabrii wonnde ɓe kaaldii e Hooreejo leydi o Makki Sall he telefon ko juuti, kadi oon fodaniiɓe reende konngol mum ngol haalnoo he yeeso ngenndi ndii fof ñalnde 3 Morso (Juillet) wonnde ƴamata happu tataɓo, e wonnde ma o tottit jappeere ndee ko yaawi caggal nde suɓngooji mbaɗa. O fodii wonnde maa o waɗ kala ko o waawi ngam reende jam e deeƴre he nder Senegaal. Ɓe kolli kadi wonnde ɓe ñaagimoomo nde o noddata jeewtidal ngenndi ngal kanko e hoore makko hunii waɗde, kadi e min toroo so ɗuum waɗii yoo jibin nanondiral beldital leyndi tawa ko fawaade he dow doosɗe e laawol kuule ngenndiyeeje.
Ɓe noddii kadi denndaangal ardiiɓe lanndaaji dawrugol, foti ko bannge lunndo ngoo walla ko to bannge laamiiɓe ɓee, e daraniiɓe geɗe renndo (société civile) nde ngarata nootitoo tawa ko he dow yeewtere ngoongɗunde wonndunde e fiɓnde tiiɗnde, mbele suɓngooji hooraagu leydi payɗi waɗde ñalnde 15 Bowte (Décembre) 2024 ene mbaɗa he dow mbaydi laaɓtundi, udditaniiɗi mo woni kala, tawa guli e jeddi ngoodataa heen. “Eɓe njogii fotde dafaade wonnde maa Senegaal men heddo e wonde model demokaraasi wonande Afrik. Maa daartol ñaawɓe.” Hooreeɓe ɗiɗo ɓe timminiri.
