Hanki, Mawnde 24 Siilo, Suudu Sarɗiyankooɓe Senegaal jooɗiima he batu keeringu ngam ittude wutte hurum sarɗiyanke Muhammadu Ngom, ɓurɗo lollirde Farba Ngom, cuɓaaɗo diiwal Maatam, kadi Meer mo Aañam. Kanko Farba ko o ɓadinooɗo hooreejo leydi kiiɗɗo o, Makki Sall.
Ngool ɓoortugol noon waɗi ko he ɗaɓɓaande Jaagorɗo Kalfinaaɗo Ñaawoore tawi ummorii ko he porokiiroor mo Republik toppitiiɗo geɗe kaalisaaji (procureur de la République du pool financier).
Sabaabu ndeen ɗaɓɓaande ndee noon ko tuumeedemo wonnde juuɗe makko ene moddi he geɗe jiɓiiɗe to bannge ngaluuji ɗi laaɓaani ko ene eyɓinee fotde 125 miliyaar CFA.
Ngool ittugol waɗaama ko aldaa he caɗeele, sabu teemedere e cappanɗe tati sarɗiyanke ene njahdi heen tawi ko tato tan ngonnoo ɓe njahdaani heen.
Kono yahdiiɓe makko dawrugol, sarɗiyankooɓe Takku Wallu Senegaal e yimɓe APR kanum en ngariino kanum en fof ene ɓoornii daneeji ene mbakki leppi mum sarɗiyankooɓe kono ɓe mbaɗtindii ko ngeddude jooɗnde ndee ngam yiyannde maɓɓe ko ndeen ɗoon ɗaɓɓaande fawaaki he dow hujjaaji laaɓɗi ruttii kadi he ɗum soomi pewje dawrugol.
He wiyde Meeteer Aysata Taal Sal, kalfinaaɗo konngol mojobere Takku Wallu, kadi gonnooɗo Jaagorɗo Kalfinaaɗo Ñaawoore he laamu Senegaal: “So min mbiyaama wonnde min (sarɗiyankooɓe ɓee) ngonaa goomu losko he ko daɗɗi ko, ɗuum ko ngoonga. Kono e min njiɗi yo min nganndine hol ko musiɗɗo amen Muhammadu Ngom waɗi ko ene wona sabaabu itteede wutte mum hurum sarɗiyanke. Ɗuum wonaa ko heewi kadi wonaa ko foti saɗtude.
Hayso tawii CENTIF ko yuɓɓo laawɗungo kadi darnaangu ko adii gargol PASTEF he dow hoore laamu he ne, won tuumooɓe ɓe y yiɗde huwtoraade ngoon yuɓɓo loskoyankeewo ngam yoftoraade terɗe laamu yawtungu nguu walla yiɗde helde bibje dawriyankooɓe ɓeɓe ndonki foolde he dawrugol.
He tuma nde suudu sarɗiyankeewu nduu woni he ngool ɓoortugol, yiɗɓe e yahdiiɓe Farba kanum en tawie ne ndenti to Aañam ngam hollude jinngol mum e leader mum men Farba Ngom. Dental mawngal teskaama toon, gila e yimɓe falnde Aañam ndee haa e ummiiɓe banngeeji goɗɗi, gila he nder diiwal Maatam he haa Ndakaaru. Teskaama kadi pelɓondiral hakkunde sanndarmaaɓe e sukaaɓe duppatnooɓe ponooji e kuwtorɗe goɗɗe ngam hollirde mette mum en.
