Ñaawirde Nuwaasoot-Hiirnaange liɓii Abdullaay Bah, kalfinaaɗo ko fayti he haala ɗanniyankooɓe he nder fedde daraniinde jojjannde aade-IRA. O ñaawaama sokngohitaande tawi heen lewbi jeegom ko dummbeede.
Dilliyanke takkaa ko wuurtde he ngañamtumaagu. O nannganoo ko ñalnde 26 Seeɗto, tawi fawnoomo junngo ko serwisaaji ndeenka leydi ndi, caggal nde o waɗi winndannde he nder resooji renndo.
Caggal gasgol ñaawoore ndee yimɓe IRA heewɓe, dilliyankooɓe e woɗɓe suniiɓe mooɓondirii he yeeso tirbinaal he ngam hollude mettere mum en kam e daranaade-mo. Heewɓe pelii ñaawoore ndee, nde he jiyanɗe mum en, ko ɗum ñaawoore dawrugol tan, kono aldaa he nuunɗal. “Ndee ɗoo ñaawoore ko feere tan ngam muɓɓude kunuɗe dartiyankooɓe”, gooto e yiɗɓe fedde nde wiyi.
Kanum fof he sokeede, Abdullay wiyi ene wondi he pellital tiiɗngal jokkude hare ngam haɓaade kala tooñannge he kala nonde waawi wayde. Sehilaaɓi makko kabri wonnde sokeedemo ustaani hay huunde he pellital makko kanum e yarlitaare makko jukkude darnde makko ngam haɓanaade ko o goongɗini ko.
