Siny Sammba ko ɓiyɗo dewbo Senegaalnaajo antarpronoor (entrepreneur), ko kanko sosi kadi ardii gollorgal biyeteengal Le Lionceau peewnoowal ñaamdu sukaaɓe (tigguuɓe haa e entaaɓe). Ko kamngal adii wonde gollorgal peewnoowal ñaamdu sukaaɓe tawa ko he Senegaal 100% fof feewna.
Ko adii ɗuum o gollatnoo ko he Blédina, catal toppitiingal ko fayti he ñaamdu sukaaɓe he susiyatee multinational Faraysenaaɓe Danon, to o wonnoo asiñoor wiɗto e ƴellitgol (ingénieur de recherche et developpement).
Kanko dewbo antarporonoor o o wiy o ɓooyi yiɗde kala ko fayti he ndefu, kadi o ɓooyi yiɗde anndude holno confitiir en e ko way noon feewnirtee. Caggal nde o heɓi seedanfaagal makko jaŋnde hakkundeere (BAC) , o jokki jaŋde toownde haa o heɓi seedanfaagal he asiñooraagal ndema-e-ñaamde (agro-alimentaires), ko ndeen o heɓi gollal he Bledina.
E sahaa nde o liggotoo to Farayse ndee, so o artii waɗti omo teskoo so o yahii he supermarcheeji he, ñameele sukaaɓe ɗe o yiyata ene njeeyee he nder Senegaal ɗee fof tawata ko gittoyaaɗe caggal leydi, alaa heen ko feewnaa he nder Senegaal, o wiy o miiji wonnde ɗum ɗoo dee ko fartaŋŋe mo nguppuɗen nafoore mum ene wirtoo en. Ko ndeen o fuɗɗii lelnude eɓɓo e diidde pewje ngam darnude isin peewnoowo ñaamdu sukaaɓe he nder Senegaal he ballal waalde walloore rewɓe Women Investment Club (WIC) e Impact Hub Dakaar, caggal ɗuum kadi woɗɓe renndidiiɓe ngari mbaɗi heen juuɗe mum en, ɓe cosi Le Lionceau he 2018, kanko e janngidiiɓe makko ɓe o wonndunoo to duɗal asiñoraagal.
Gollorgal makko ngal hannde ene gollina yimɓe 30, kadi ene feewna ko ene wona geɗe 15 ceertuɗe he ñaamduuji sukaaɓe, ko wayno piireeji, compote, mbiskitaaji e sereyaaluuji. Caggal duuɓi tati tan ko gollorgal ngal sosa he 2018, taw mbaɗtii yeeyde ko ene sowoo hakki laabi nay e ko puɗɗorinoo ko.
He nder laaɓndal-am e jaabowol-ma hakkunde makko e BBC o wiy ɓe puɗɗorii Lionceau ko seeɗe tan. “Ko seeɗa tan min puɗɗorii he nder defnirde. Ko ɗoon min ƴeewndotonoo mbaɗmi-mbaɗmiiji ndefuuji amen ñaamdu sukaaɓe,” O wiy eɓe njoginoo hakke yummiraaɓe (neeniraaɓe) sappo ko kanum en ngonno meeɗ-njiyaa en maɓɓe. Kala ndeɓe pewji ndefu ko ɓeen ɓe tottata ƴeewndoo ɗum, ndokkaɓe heen jiyanɓe mum en hade maɓɓe waɗtude yeeyde ɗum he nder jeereeji.
Ɗo adan ɗoo, ɓe puɗɗorii tan ko ndefu ngootu, ɗuum woni banaana e conndi gawri, “min njiɗnoo ko feewnude huunde wande no ruy ni, ko neeniraaɓe keewi ñamminde sukaaɓe mum en ko.”
Siny wiy caggal nde o jibini kadi o ɓeydii yaajnaade e hettude ndefuuji kesi ñaamdu sukaaɓe taw ene yahdi e geɗe coñateeɗe he nder leydi he kadi gaadanteeje, goowaaɗe, ko wayno faataata, pappaaya, manngo, ɓohe, ditak e ñebbe.
Siny Samba wiy caggal nde gollemaɓɓe njahri yeeso he nder Senegaal, eɓe njiɗi fooɗanaade lesɗeele takko Senegaal, ko wayno Cote d’ivoire, Mali, Guinee haa Ghana. Kadi eɓe njiɗi kadi toɓɓude Senegaalnaaɓe wonɓe caggal leydi, ko ɗuum waɗi eɓena ƴeewa holnoɓe mbaawi gollondirde e Amazon kanum e C-discount.
