Hooreji leydi Siin (Chine), Xi Jinping yahii njillu to Moskuu, leydi Russia hannde Aaɓnde (Altine) 20 Mbooy, 2023. Jaɓɓiimo Kremlin ko tolno makko o, Waladimir Putin, hooreejo leydi Russia.
Nde hooreejo leydi Siin o ƴetti konngol o holli weltaare makko he yillaade Moskuu, sabu o wiy Beijing e Moskuu ko hoddiiɓe welduɓe, kadi gollindirooɓe hoolondirɓe.
“Miɗo jogii weltaare kadi he fawde koyɗe am he dow lesdi Russia, tawa kadi ko he bismaango Hooreejo Vladimir Putin.” Hooreejo leydi Siin wiyi.
He innde laamu kam e yimɓe leydi Siin, miɗo yettina calminaali gulɗi (guurɗi) fayde he laamu e yimɓe Russia, kadi miɗo toronoo ɗum en ko ɓuri he moƴƴere. Siin e Russia ko hoddiiɓe welduɓe kadi liggondirooɓe hoolondirɓe ɓe jokkondiri ɗum en, fellooje e maaje denndaaɗe.” Xi Jinping teeŋtini.
Hooreejo leydi Siin o siftinii, won nde o ari ɗoo duuɓi sappo jawtuɗi, tawi ko o hooreejo leydi Siin, ngaan tuma kanko e Hooreejo Putin ɓe udditii hello heso he ko yowitii he ƴellitaare jokkondiral hakkunde leyɗeele maɓɓe. O wiy ko ene ɓura jooni duuɓi sappo, leyɗeele maɓɓe ɗiɗi ɗee, ɓeydii-ma tiiɗtinde kadi e ɓeydude jokkondiral hakkunde maɓɓe tawi fawii ko kuwtondiral ngal aldaa e heedi-heeda, duudondiral, walla toɓɓude hay gooto goɗɗo. Ɗuum hollirii yeru moƴƴo ngam ƴellitde model keso mo leyɗeele mawɗe mbaawta jokkondirde tawi wootiri heen kala ene hurmii ngoɗndi ndii.
Sikke alaa, leyɗeele Hiirnaange (occident) ene mbaɗti hakkille no feewi e nguuɗoo njillu, arngu ñalawma gooto tan caggal nde Cour Penal International (CPI) werlii laakngal yoo Putin jagge ñaawe sabu kirim he dow neɗɗanke.
Njillu Hooreejo leydi Siin hakke balɗe tati to Moskuu, ene hollira jaggan ngol tiiɗngol ngol Siin jaggani Russia gila nde leydi Russia yani he leydi Ukraine. Kadi ɓeydanii Putin hoolaare. Njillu nguu ari kadi ko tuma nde Xi ɗaɓɓata yoo Siin ndaarde wonnde ko baawɗo addude jam e nanondiral hakkunde leyɗeele ɗiɗi kaɓtooje ɗe, kono leyɗeele hiirnaange tuumi ko fayndaare Siin ko wallude Moskuu he kiɓirɗe wolde.
